بوكستان قازاقستان قۇراماسىنىڭ باس باپكەرى قايرات ءساتجانوۆ بەينەۇندەۋ جاسادى، دەپ حابارلايدى "ادىرنا" ۇلتتىق پورتالى.
ونىڭ ۆيدەوسى فەدەراتسيانىڭ ينستا پاراقشاسىندا جاريالاندى.
"مەملەكەت جانە قازاقستان بوكس فەدەراتسياسىنىڭ باسشىلىعى سەنىم بىلدىرگەندەرىڭىزگە كوپ راحمەت. بۇل ءبىز ءۇشىن ۇلكەن جاۋاپكەرشىلىك دەپ بىلەمىن. بۇگىندە قازاقستان بوكسىندا بىرقاتار ماسەلە بار. ول ماسەلەلەردى ءوزىمىز پاريج وليمپياداسىندا كوردىك. ەڭ الدىمەن جاتتىعۋ جوسپارى دۇرىس قۇرىلماعان جانە كوماندالارمەن بىرىككەن وقۋ-جاتتىعۋ جيىندارى وتپەگەن. العا قويعان جوسپارلارىمىز وتە كوپ. ولار: جاسوسپىرىمدەر، جاستار جانە ۇلتتىق قۇرامانىڭ بارىنە بىردەي كوڭىل ءبولۋ، قازاقستاندا بولاتىن جارىستاردى، ىرىكتەۋ تۋرنيرلەرىن ءادىل وتكىزۋ، جاتتىعۋ جيىندارىنىڭ ءبارىن ءبىر جۇيەگە كەلتىرۋ. كوماندا جۇمىسىن جاقسارتۋ ءۇشىن شەتەلدەن ماماندار، اتاپ ايتقاندا، جالپى دەنە دايىندىعىنىڭ مامانى، عىلىمي توپ جانە باپكەر-كونسۋلتانت شاقىرۋ ويىمىزدا بار. قازاقستان ۇلتتىق قۇراماسىنىڭ باس باپكەرى بولۋ – ەلگە قىزمەت ەتۋ. ەل سەنىمىن اقتاۋعا بارىمدى سالامىن", – دەدى ول.
