Қайрат Сәтжанов бокстан Қазақстан ерлер құрамасының бас бапкері болып тағайындалды. Бұл туралы Қазақстан бокс федерациясы мәлімдеді, деп хабарлайды “Адырна” ұлттық порталы.
«Қазіргі уақытта жаңа жаттықтырушылар құрамы жасақталуда, оның ішінде: шетелдік кеңесші жаттықтырушылар, дене шынықтыру бойынша жаттықтырушы, сондай-ақ ғылыми топ бар», - деп хабарлады бокс федерациясы.
Қайрат Сәтжанов 54 жаста. Ол бокстан Қазақстан Республикасының еңбек сіңірген жаттықтырушысы. 2021-2022 жылдары ол ұлттық құраманы жаттықтырса, 2024 жылдан бастап жастар құрамасының аға жаттықтырушысы болды.
«Жеке бапкер ретінде Қайрат Сәтжанов бокстан жеті әлем және 43 Азия чемпионын дайындады», - деп атап өтті федерация.
Бұл ретте бас жаттықтырушының жеке шәкірттерінің болуына тыйым салынады деген талап енгізілді.
Айта кетейік, бұған дейін Олимпиададағы сәтсіздіктен кейін бокстан Қазақстан құрамасының басшылығында өзгерістер болған еді.
