Telegram جەلىسىنىڭ نەگىزىن قالاۋشى رەسەيلىك پاۆەل دۋروۆ قازاقستانداعى اۋىل بالالارى ءۇشىن IQanat مەكتەبىنە قۇنى 356 000 اقش دوللارىن قۇرايتىن 12 گرانت ءبولدى. بۇل تۋرالى كاسىپكەر ايدىن راقىمباەۆ ايتتى، دەپ حابارلايدى «ادىرنا» ءتىلشىسى.
«پاۆەل Google Map-تا ءبىزدىڭ مەكتەپتى كورىپ، قىزىعۋشىلىق تانىتقان ەدى. ونىڭ ءوتىنىشىن بىردەن قابىل الدىق. ساپار بارىسىندا ول وقۋ پروتسەسىنىڭ ەگجەي-تەگجەيىن، مىڭداعان اۋىل بالاسىنىڭ قاي فورماتتا وليمپيادالاردا ىرىكتەلەتىنىن سۇراي باستادى. قاراپايىم اۋىل بالالارىنىڭ كەرەمەت ناتيجە كورسەتىپ، شەتەلدىك ۋنيۆەرسيتەتتەرگە گرانتقا تۇسەتىنىن بىلگەن ول گرانت الا الماعان بىرنەشە بالانىڭ وقۋىنا اقشا تولەۋدى ۇسىندى»،— دەدى ول.
پاۆەل دۋروۆ ءوزى ۇسىنعان گرانتقا لايىق اۋىل بالالارىن ءوزى زەرتتەپ، ىرىكتەۋگە قاتىسقان.
ايتا كەتەيىك، گرانت يەگەرلەرىن تاڭداۋ بارىسىندا وقۋشىلاردىڭ اكادەميالىق جەتىستىكتەرى، قوعامدىق بەلسەندىلىگى جانە شىعارماشىلىق قابىلەتتەرى ەسكەرىلدى. ءار گرانتتىڭ قۇنى شامامەن 29 666 اقش دوللارىن قۇرايدى.
