ەلىمىزگە اتالمىش تەرميندى العاش ەنگىزىپ، قازاقشا كونتەنتتى جاڭا ارناعا بۇرعان №1 اۆتوبلوگەر ولجاس وقاستى تانىمايتىن جان كەمدە-كەم شىعار. بۇگىنگى ماتەريالدا ونىمەن ەلىمىزدەگى قازاق ءتىلدى ونىمدەردىڭ وتىمدىلىگى، بلوگەرلىككە كەلۋ جولى جايلى تىلدەسىپ كوردىك.
بۇگىنگى تاڭدا اۆتوبلوگگەرلىكتى ناعىز كاسىپ دەپ ساناۋعا بولادى. اۆتوبلوگەر - رەجيسسەرلىك قابىلەت پەن ستسەناري جازا الۋى، ءتۇسىرىلىم مەن مونتاجدى قاداعالاي الۋى جانە ارينە كولىكتەردى جاقسى تۇسىنە ءبىلۋى كەرەك.
ءبارى قالاي باستالدى؟
- ولجاس مىرزا، ءوزىڭىز تۋرالى ايتا كەتسەڭىز. قاي ءوڭىردىڭ تۋماسىسىز، قايدا وقىدىڭىز؟
- مەن الماتى وبلىسىنداعى قوعالى اۋىلىندا دۇنيەگە كەلدىم. الماتىدا ءوستىم، 13-ءشى ورتا مەكتەبىن اياقتاپ، قازۇۋ-ءدىڭ جۋرناليستيكا فاكۋلتەتىنە ءتۇستىم. ءبىرىنشى كۋرستا “قازاقستان” ۇلتتىق تەلەارناسىندا تاجىريبە جيناپ، ارتىنشا “الماتى” تەلەارناسىندا اۆتورلىق باعدارلاما جۇرگىزدىم.
- اۆتوموبيلدەرگە دەگەن قىزىعۋشىلىعىڭىزدى نە وياتتى؟ كىشكەنتايدان كولىكتەردى جاقسى كورەتىن با ەدىڭىز؟
- ءيا، مەكتەپ قابىرعاسىندا كولىككە قىزىعىپ ساباق كەزىندە سپورتتىق كولىكتەردىڭ ديزاينىن سىزىپ وتىراتىنمىن. 2010-2013 جىلدارى رەسەيدە اۆتوبلوگينگ قاتتى دامىدى. قازاق اۆتوجۋرناليستيكاسىنىڭ نەگىزىن قالاپ ءبىرىنشى اۆتور اتانعىم كەلدى. ويداعىنى ىسكە اسىردىم.
«ءوزىمدى اۆتوبلوگەر دەپ اتاعىم كەلمەيدى»
- اۆتوبلوگينگ تۋرالى يدەيا قايدان تۋدى؟ بلوگەرلىك جولىڭىز جايلى ايتا كەتسەڭىز. قاشان، قالاي باستالدى؟
- ءوزىمدى اۆتوبلوگەر دەپ اتاعىم كەلمەيدى. جۋرناليستىك ءبىلىمىم بار. 2017 جىلى قاسكەلەڭدەگى “بارىس” اۆتوبازارىنىڭ يۋتۋب كانالىن جۇرگىزۋگە ۇسىنىس تۇسكەندە قۋانا قابىلداپ، ىلگەرى جىلجىدىم. جارتى جىلدا 100 مىڭ جازىلۋشى جيناپ تەز ارادا تانىمال بولدىم. ارتىنشا “كولەسا” كومپانياسىنان جۇمىسقا شاقىرتۋ الدىم. بۇل جەردە قازاقستانداعى ەڭ مىقتى، اقىلدى، تالانتتى كىسىلەر جۇمىس ىستەيدى. كوماندالىق جۇمىس اياسىندا تالانتتى بىلىممەن كۇشەيتىپ ەلدەگى توپ كونتەنتتى شىعاردىق.
- قازاقستان ءۇشىن اتالمىش كونتەنت ءتۇرى ءوتىمدى مە؟ حالىق قالاي قابىلدايدى؟ قارالىم جاعى قالاي؟
- “اتقا ءمىنىپ وسكەن” قازاق قاشاندا جىلجىمالى تەحنيكاعا قىزىعادى. اۆتوموبيل حاقىندا ساپالى كونتەنتكە ءزارۋ بولعان اۋديتوريا مەنى قۋانا قابىلدادى، قولدادى.
“كولەسا” كومپانياسىندا، مىنەكەي، التى جىل قاتارىنان ۇزدىكسىز ۆيدەو جاريالاپ جاتىرمىز. قازاققا وتە قىزىق مودەلدەر تۋرالى ايتقاندا قارالىم وتە جاقسى. اراسىندا ەكسكليۋزيۆتى، بەيتانىس كولىكتەر جايىندا رەپورتاج جاساعاندا قارالىم ازداۋ. دەگەنمەن، تەحنيكانى سۇيەتىن ادام وزىنە كەرەگىن الادى. ەڭ باستىسى، جۇمىستى تياناقتى، شىن كوڭىلمەن ازىرلەگەندىكتەن كورەرمەن لايىقتى باعاسىن بەرىپ وتىر.
- قازىرگى ۋاقىتتا نارىقتاعى ەڭ ۇزدىك ءۇش اۆتوكولىكتى اتاي الاسىز با جانە نەلىكتەن؟
- ۇزدىك ءۇش كولىكتى اتاۋ قيىن. بۇل سۇيىكتى مۋزىكا، تاڭعالدىراتىن فيلم سەكىلدى اۋىسپالى دۇنيە.
ءوزىڭىز شولۋ جاساعان توپ-چارتىڭىز قانداي دەسەڭىز: Tesla Cibertrack, Ferrari F8, Mercedes-AMG G63
«ەلەكتر ەنەرگياسىمەن جۇرەتىن كولىك ويىنشىق سەكىلدى»
- ەلەكتروموبيلدەر مەن گيبريدتى اۆتوكولىكتەر تۋرالى ويىڭىز قانداي؟
- ەلەكتريفيكاتسيا بۇكىل الەمدە قارقىن الدى. بۇعان ءدۇمپۋ بەرگەن يلون ماسك پەن قىتاي ءوندىرىسى. قازاقتار ءۇشىن تەك قانا ەلەكتر ەنەرگياسىمەن جۇرەتىن كولىك ويىنشىق سەكىلدى. بەنزين سۋدان ارزان مەملەكەتتە ءداستۇرلى موتور ەكىنشى ورىنعا جىلجىمايدى.
گيبريد قوندىرعىسى بار اۆتوموبيلدەر بولەك اڭگىمە. ءبىزدىڭ حالىققا ىڭعايلى اۆتوموبيل وسى. تەحنولوگيالى ءھام ۇنەمدى.
- الداعى ۋاقىتتا حالىققا قانداي جاڭا جوبالار ۇسىناسىز؟ قانداي تىڭ يدەيالار بار؟
- راسىن ايتايىن، ازىرشە جوسپارلانعان پروەكتىلەردى ىسكە اسىرۋمەن ءجۇرمىز. كەلەشەكتە نە بولارىن بىلمەيمىن. وسى ماسەلەگە بايلانىستى كوپ ويلانام، كوپ تولعانام…
- جاۋابىڭىزعا راقمەت!
دينا ليتپين
«ادىرنا» ۇلتتىق پورتالى
