Elimizge atalmysh termındi alǵash engizip, qazaqsha kontentti jańa arnaǵa burǵan №1 avtobloger Oljas Oqasty tanymaıtyn jan kemde-kem shyǵar. Búgingi materıalda onymen elimizdegi qazaq tildi ónimderdiń ótimdiligi, blogerlikke kelý joly jaıly tildesip kórdik.
Búgingi tańda avtobloggerlikti naǵyz kásip dep sanaýǵa bolady. Avtobloger - rejısserlik qabilet pen senarıı jaza alýy, túsirilim men montajdy qadaǵalaı alýy jáne árıne kólikterdi jaqsy túsine bilýi kerek.
BÁRI QALAI BASTALDY?
- Oljas myrza, ózińiz týraly aıta ketseńiz. Qaı óńirdiń týmasysyz, qaıda oqydyńyz?
- Men Almaty oblysyndaǵy Qoǵaly aýylynda dúnıege keldim. Almatyda óstim, 13-shi orta mektebin aıaqtap, QazUÝ-diń jýrnalıstıka fakýltetine tústim. Birinshi kýrsta “Qazaqstan” Ulttyq telearnasynda tájirıbe jınap, artynsha “Almaty” telearnasynda avtorlyq baǵdarlama júrgizdim.
- Avtomobılderge degen qyzyǵýshylyǵyńyzdy ne oıatty? Kishkentaıdan kólikterdi jaqsy kóretin ba edińiz?
- Iá, mektep qabyrǵasynda kólikke qyzyǵyp sabaq kezinde sporttyq kólikterdiń dızaınyn syzyp otyratynmyn. 2010-2013 jyldary Reseıde avtoblogıng qatty damydy. Qazaq avtojýrnalıstıkasynyń negizin qalap birinshi avtor atanǵym keldi. Oıdaǵyny iske asyrdym.
«ÓZIMDI AVTOBLOGER DEP ATAǴYM KELMEIDI»
- Avtoblogıng týraly ıdeıa qaıdan týdy? Blogerlik jolyńyz jaıly aıta ketseńiz. Qashan, qalaı bastaldy?
- Ózimdi avtobloger dep ataǵym kelmeıdi. Jýrnalıstik bilimim bar. 2017 jyly Qaskeleńdegi “Barys” avtobazarynyń Iýtýb kanalyn júrgizýge usynys túskende qýana qabyldap, ilgeri jyljydym. Jarty jylda 100 myń jazylýshy jınap tez arada tanymal boldym. Artynsha “Kolesa” kompanııasynan jumysqa shaqyrtý aldym. Bul jerde Qazaqstandaǵy eń myqty, aqyldy, talantty kisiler jumys isteıdi. Komandalyq jumys aıasynda talantty bilimmen kúsheıtip eldegi top kontentti shyǵardyq.
- Qazaqstan úshin atalmysh kontent túri ótimdi me? Halyq qalaı qabyldaıdy? Qaralym jaǵy qalaı?
- “Atqa minip ósken” qazaq qashanda jyljymaly tehnıkaǵa qyzyǵady. Avtomobıl haqynda sapaly kontentke zárý bolǵan aýdıtorııa meni qýana qabyldady, qoldady.
“Kolesa” kompanııasynda, minekeı, alty jyl qatarynan úzdiksiz vıdeo jarııalap jatyrmyz. Qazaqqa óte qyzyq modelder týraly aıtqanda qaralym óte jaqsy. Arasynda eksklıýzıvti, beıtanys kólikter jaıynda reportaj jasaǵanda qaralym azdaý. Degenmen, tehnıkany súıetin adam ózine keregin alady. Eń bastysy, jumysty tııanaqty, shyn kóńilmen ázirlegendikten kórermen laıyqty baǵasyn berip otyr.
- Qazirgi ýaqytta naryqtaǵy eń úzdik úsh avtokólikti ataı alasyz ba jáne nelikten?
- Úzdik úsh kólikti ataý qıyn. Bul súıikti mýzyka, tańǵaldyratyn fılm sekildi aýyspaly dúnıe.
Ózińiz sholý jasaǵan top-chartyńyz qandaı deseńiz: Tesla Cibertrack, Ferrari F8, Mercedes-AMG G63
«ELEKTR ENERGIIaSYMEN JÚRETIN KÓLIK OIYNShYQ SEKILDI»
- Elektromobılder men gıbrıdti avtokólikter týraly oıyńyz qandaı?
- Elektrıfıkaııa búkil álemde qarqyn aldy. Buǵan dúmpý bergen Ilon Mask pen Qytaı óndirisi. Qazaqtar úshin tek qana elektr energııasymen júretin kólik oıynshyq sekildi. Benzın sýdan arzan memlekette dástúrli motor ekinshi orynǵa jyljymaıdy.
Gıbrıd qondyrǵysy bar avtomobılder bólek áńgime. Bizdiń halyqqa yńǵaıly avtomobıl osy. Tehnologııaly hám únemdi.
- Aldaǵy ýaqytta halyqqa qandaı jańa jobalar usynasyz? Qandaı tyń ıdeıalar bar?
- Rasyn aıtaıyn, ázirshe josparlanǵan proektilerdi iske asyrýmen júrmiz. Keleshekte ne bolaryn bilmeımin. Osy máselege baılanysty kóp oılanam, kóp tolǵanam…
- Jaýabyńyzǵa raqmet!
Dına Lıtpın
«Adyrna» ulttyq portaly
