ءماجىلىس دەپۋتاتى داۋلەت تۇرلىحانوۆتىڭ ۇلى باسشىنىڭ بۇيرىعىنا باعىنباعانى جانە ورىنداماعانى ءۇشىن اكىمشىلىك جاۋاپكەرشىلىككە تارتىلدى، - دەپ حابارلايدى "ادىرنا" پورتالى الماتى سوتىنىڭ ءباسپاسوز قىزمەتىنە سىلتەمە جاساپ.
"الماتى اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتىندا اكىمشىلىك قۇقىق بۇزۋشىلىق جاساعان قاتارداعى ب.-عا قاتىستى اكىمشىلىك ءىس قارالدى - اسكەري ءبولىم باستىعىنىڭ بەلگىلەنگەن تارتىپپەن بەرىلگەن بۇيرىعىن ورىنداۋدان اشىق باس تارتۋ. سوت 2023 جىلعى 2 شىلدەدە اسكەري ءبولىمنىڭ اسكەري قىزمەتشىسى قاتارداعى ب.-نىڭ الماتى گارنيزونىنىڭ گاۋپتۆاحتاسىنان شىققاننان كەيىن كومانديردىڭ بۇيرىعىنا سايكەس ءوزىنىڭ اسكەري بولىمىنە بارۋعا مىندەتتى بولعانىن انىقتادى. الايدا ول وعان لەيتەنانت ا. اكەلگەن ءبولىم كومانديرىنىڭ بۇل بۇيرىعىن ورىنداۋدان اشىق تۇردە باس تارتىپ، اسكەري پوليتسيا باسقارماسىنىڭ عيماراتىنا كەلگەن كولىكپەن بەلگىسىز باعىتتا كەتىپ قالعان", - دەلىنگەن سوت حابارلاماسىندا.
سوت وتىرىسىندا تۇرلىحانوۆتىڭ ۇلى ءىس ماتەريالدارىندا كورسەتىلگەن دەرەكتەردى راستادى.
"سوت قاۋلىسى بويىنشا، قاتارداعى جاۋىنگەر ب. اقبتك-ءنىڭ 652-بابى 6-بولىگىندە كوزدەلگەن اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىلىپ، وعان 15 تاۋلىككە اكىمشىلىك قاماققا الۋ تۇرىندەگى اكىمشىلىك جازا تاعايىندالدى. سوت قاۋلىسى كۇشىنە ەنگەن جوق", - دەلىنگەن حابارلامادا.
ەسكە سالايىق، بۇعان دەيىن الماتىدا اسكەري قىزمەتكەر بەلگىلى ادۆوكاتتى سوققىعا جىققانى حابارلانعان بولاتىن. بۇل وقيعا 11 اقپانعا قاراعان ءتۇنى الماتىنىڭ ساۋدا ورتالىقتارىنىڭ ءبىرىنىڭ ماڭىنداعى پاركينگتە بولعان. ءىس قوعامدىق داۋ تۋدىردى.
