«قازاگروقارجى» اق ا.ج. 12 تامىزىنان باستاپ «قازاقستاندا جاسالعان»، «ءوز جەم-ءشوبىمىز» جانە «6% جەڭىلدىكتى ليزينگ» اۋىل شارۋاشىلىعى تەحنيكاسىن ليزينگكە الۋ باعدارلامالارى بويىنشا وتىنىمدەردى قابىلدايدى.
بۇل باستاما زاماناۋي اۋىل شارۋاشىلىعى تەحنيكاسىنا سۇرانىستى ارتتىرۋ جاعدايىندا وتاندىق فەرمەرلەردى قولداۋعا باعىتتالعان.
اۋىل شارۋاشىلىعى تاۋارلارىن وندىرۋشىلەردى قارجىلاندىرۋ ءۇشىن ليزينگتىڭ ءۇش جەڭىلدىكتى باعدارلاماسى بويىنشا 11,8 ملرد تەڭگە ءبولىندى. ونىڭ ىشىندە «ءوز جەم-ءشوبىمىز» باعدارلاماسىنا 3,3 ملرد تەڭگە، «قازاقستاندا جاسالعان» باعدارلاماسىنا 5,5 ملرد تەڭگە، «6% جەڭىلدىكتى ليزينگ» باعدارلاماسىنا 3 ملرد تەڭگە.
«باعدارلامالار فەرمەرلەر مەن اگروونەركاسىپتىك كەشەندەرگە نارىقتىق مولشەرلەمەدەن ەداۋىر تومەن جەڭىلدىكپەن جاڭا تەحنيكانى ساتىپ الۋعا مۇمكىندىك بەرەدى. تراكتورلاردى، كومباينداردى جانە ارنايى تەحنيكانى قوسا العاندا، اۋىل شارۋاشىلىعى ماشينالارىنىڭ كەڭ سپەكترىن ليزينگكە الۋعا بولادى»، – دەدى «قازاگروقارجى» اق باسقارما توراعاسى ايدار پراشەۆ.
اۋىل شارۋاشىلىعى مينيسترلىگىنىڭ مالىمەتىنشە، «قازاقستاندا جاسالعان» باعدارلاماسى بويىنشا جىلدىق 6% مولشەرلەمە بويىنشا وتاندىق وندىرىستىڭ/قۇراستىرۋدىڭ اسپالى، تىركەمەلى جانە وزدىگىنەن جۇرەتىن اۋىل شارۋاشىلىعى تەحنيكاسىن، كولىك قۇرالدارىن ساتىپ الۋعا بولادى. مەرزىمى – 10 جىلعا دەيىن، الدىن-الا تولەمى ليزينگ نىساناسىنىڭ قۇنىنىڭ 15%-ىنان باستالادى.
«ءوز جەم-ءشوبىمىز» باعدارلاماسى جەم-ءشوپ دايىنداۋ تەحنيكاسى مەن سۋارۋدىڭ ءموبيلدى جۇيەلەرىن قارجىلاندىرۋعا باعىتتالعان. مولشەرلەمە جىلدىق 6%، اۆانسى كەمىندە 15% قۇرايدى، مەرزىمى 10 جىلعا دەيىن. سونداي-اق الدىن الا تولەمدى كەيىنگە قالدىرۋ قاراستىرىلعان.
«6% جەڭىلدىكتى ليزينگ» باعدارلاماسى 10 جىلعا دەيىنگى مەرزىمگە الدىن-الا تولەمسىز جەڭىلدىكتى شارتتارمەن وتاندىق وندىرىستىڭ/قۇراستىرۋدىڭ وزدىگىنەن جۇرەتىن اۋىل شارۋاشىلىعى تەحنيكاسىن ليزينگكە ساتىپ الۋعا مۇمكىندىك بەرەدى.
وتىنىمدەردى قابىلداۋ Telegram-بوت [https://t.me/kaz_agro_finance_bot] ارقىلى جۇزەگە اسىرىلادى. باعدارلاماعا قاتىسۋ ءۇشىن «قازاگروقارجى» اق فيليالىنا بارلىق قاجەتتى قۇجاتتاردى Telegram-بوت ارقىلى ءوتىنىم بەرىلگەن كۇننەن باستاپ، 5 جۇمىس كۇنى اراسىندا ۇسىنۋ قاجەت.
باعدارلامالاردىڭ شارتتارى تۋرالى تولىعىراق اقپاراتتى كومپانيانىڭ فيليالدارىنان بىلۋگە بولادى
