«QazAgroQarjy» AQ a.j. 12 tamyzynan bastap «Qazaqstanda jasalǵan», «Óz jem-shóbimiz» jáne «6% jeńildikti lızıng» aýyl sharýashylyǵy tehnıkasyn lızıngke alý baǵdarlamalary boıynsha ótinimderdi qabyldaıdy.
Bul bastama zamanaýı aýyl sharýashylyǵy tehnıkasyna suranysty arttyrý jaǵdaıynda otandyq fermerlerdi qoldaýǵa baǵyttalǵan.
Aýyl sharýashylyǵy taýarlaryn óndirýshilerdi qarjylandyrý úshin lızıngtiń úsh jeńildikti baǵdarlamasy boıynsha 11,8 mlrd teńge bólindi. Onyń ishinde «Óz jem-shóbimiz» baǵdarlamasyna 3,3 mlrd teńge, «Qazaqstanda jasalǵan» baǵdarlamasyna 5,5 mlrd teńge, «6% Jeńildikti lızıng» baǵdarlamasyna 3 mlrd teńge.
«Baǵdarlamalar fermerler men agroónerkásiptik keshenderge naryqtyq mólsherlemeden edáýir tómen jeńildikpen jańa tehnıkany satyp alýǵa múmkindik beredi. Traktorlardy, kombaındardy jáne arnaıy tehnıkany qosa alǵanda, aýyl sharýashylyǵy mashınalarynyń keń spektrin lızıngke alýǵa bolady», – dedi «QazAgroQarjy» AQ basqarma tóraǵasy Aıdar Prashev.
Aýyl sharýashylyǵy mınıstrliginiń málimetinshe, «Qazaqstanda jasalǵan» baǵdarlamasy boıynsha jyldyq 6% mólsherleme boıynsha otandyq óndiristiń/qurastyrýdyń aspaly, tirkemeli jáne ózdiginen júretin aýyl sharýashylyǵy tehnıkasyn, kólik quraldaryn satyp alýǵa bolady. Merzimi – 10 jylǵa deıin, aldyn-ala tólemi lızıng nysanasynyń qunynyń 15%-ynan bastalady.
«Óz jem-shóbimiz» baǵdarlamasy jem-shóp daıyndaý tehnıkasy men sýarýdyń mobıldi júıelerin qarjylandyrýǵa baǵyttalǵan. Mólsherleme jyldyq 6%, avansy keminde 15% quraıdy, merzimi 10 jylǵa deıin. Sondaı-aq aldyn ala tólemdi keıinge qaldyrý qarastyrylǵan.
«6% jeńildikti lızıng» baǵdarlamasy 10 jylǵa deıingi merzimge aldyn-ala tólemsiz jeńildikti sharttarmen otandyq óndiristiń/qurastyrýdyń ózdiginen júretin aýyl sharýashylyǵy tehnıkasyn lızıngke satyp alýǵa múmkindik beredi.
Ótinimderdi qabyldaý Telegram-bot [https://t.me/kaz_agro_finance_bot] arqyly júzege asyrylady. Baǵdarlamaǵa qatysý úshin «QazAgroQarjy» AQ fılıalyna barlyq qajetti qujattardy Telegram-bot arqyly ótinim berilgen kúnnen bastap, 5 jumys kúni arasynda usyný qajet.
Baǵdarlamalardyń sharttary týraly tolyǵyraq aqparatty kompanııanyń fılıaldarynan bilýge bolady
