قازاقستاندىق وقۋشىلار فيزيكادان ەڭ بەدەلدى حالىقارالىق ءبىلىم دوداسىندا ەل تاريحىنداعى ەڭ ۇزدىك ناتيجەگە قول جەتكىزدى. 2026 جىلعى 4-12 شىلدە ارالىعىندا كولۋمبيانىڭ بۋكارامانگا قالاسىندا وتكەن 56-شى حالىقارالىق فيزيكا وليمپياداسىندا (International Physics Olympiad, IPhO) ۇلتتىق قۇرامانىڭ بەس مۇشەسى دە التىن مەدال جەڭىپ الدى. بۇل تۋرالى وقۋ-اعارتۋ مينيسترلىگى ايتتى، دەپ حابارلايدى «ادىرنا» ءتىلشىسى.
بيىل وليمپياداعا الەمنىڭ 85 ەلىنەن 381 وقۋشى قاتىسقان. قاتىسۋشىلار كۇردەلى تەوريالىق جانە ەكسپەريمەنتتىك تاپسىرمالاردى ورىنداپ، بىلىمدەرى مەن عىلىمي دايارلىقتارىن سىنعا سالعان.
قازاقستاندىق جاس فيزيكتەر جوعارى دايىندىق دەڭگەيىن كورسەتىپ، بەس التىن مەدال يەلەنگەن. مينيسترلىك مالىمەتىنشە، بۇل – قازاقستاننىڭ IPhO وليمپياداسىنا قاتىسۋ تاريحىنداعى ەڭ ۇزدىك ناتيجە.
استانا قالاسىنداعى NURORDA مەكتەپ-ليتسەيىنىڭ 11-سىنىپ وقۋشىسى نۇرگۇل ەگەنبەرگەنوۆا، استانا قالاسىنداعى جاراتىلىستانۋ-ماتەماتيكا باعىتىنداعى NIS-ءتىڭ 12-سىنىپ وقۋشىسى اميربەك ازاتبەكوۆ، استانا قالاسىنداعى Spectrum International School مەكتەبىنىڭ 12-سىنىپ وقۋشىسى يلياس قازىمبەك، الماتى قالاسىنداعى «ميراس» حالىقارالىق مەكتەبىنىڭ 12-سىنىپ وقۋشىسى رومان چەرەمنوۆ، استانا قالاسىنداعى جاراتىلىستانۋ-ماتەماتيكا باعىتىنداعى NIS-ءتىڭ 11-سىنىپ وقۋشىسى دامير قۇرمان التىن مەدال يەگەرلەرى اتانعان.
«بۇل تاريحي جەتىستىككە ۇلتتىق قۇراما ءۇش جىل بويى جۇيەلى دايىندالدى. كوماندانى مەكتەپ مۇعالىمدەرى، تالىمگەرلەرى جانە ۇلتتىق قۇرامانىڭ جاتتىقتىرۋشىلارى دايىندادى. دايىندىق جۇمىستارىنا ءال-فارابي اتىنداعى قازاق ۇلتتىق ۋنيۆەرسيتەتىنىڭ اعا وقىتۋشىسى، PhD دوكتورى گۇليا نۇرباقوۆا جەتەكشىلىك ەتتى. ال حالىقارالىق فيزيكا وليمپياداسىندا ۇلتتىق قۇرامانىڭ جۇمىسىن SDU ۋنيۆەرسيتەتىنىڭ اعا وقىتۋشىسى، PhD دوكتورى سامات ماقسۇتوۆ پەن فيزيكادان حالىقارالىق وليمپيادالاردىڭ جۇلدەگەرى اليشەر ەركەباەۆ ۇيلەستىردى»،– دەلىنگەن حابارلامادا.
ايتا كەتەيىك، حالىقارالىق فيزيكا وليمپياداسى 1967 جىلدان بەرى وتكىزىلىپ كەلەدى. قازاقستان بۇل ءبىلىم دوداسىنا 1997 جىلدان بەرى تۇراقتى قاتىسىپ كەلەدى. 2025 جىلى ۇلتتىق قۇراما ەكى كۇمىس جانە ءۇش قولا مەدال جەڭىپ العان بولاتىن.
