مەنىڭ ويىمشا ءبىزدىڭ قوعام كاپيتاليزمنىڭ قاتال زاڭدىلىقتارىنا جىل وتكەن سايىن ەنىپ بارادى. تۋراسىن ايتۋ كەرەك قازاق حالقى ەشقاشان كاپيتاليزمدە ءومىر ءسۇرىپ، الەمدىك وركەنيەتتە عىلىم، ءبىلىم، جاڭالىق اشۋدان، ەكونوميكادان شىنايى باسەكەگە ءتۇسىپ كورمەگەن. قازىرگى وتپەلى كەزەڭدە قۇندىلىقتار مەن زامانعا ساي كەلمەيتىن سانانىڭ ترانسفورماتسياسىن باستان وتكەرۋىمىز قاجەت. جالپى ۇلت مودەرنيزاتسياعا ءتۇسۋى كەرەك. بولمىسى مەن ساناسى، الەمدى قابىلداۋ تۇسىنىگى ترانسفورماتسيادان ءوتۋى ءتيىس. اۋىر بولسا دا بۇل جولدان ءوتۋىمىز قاجەت. الەمگە اشىلۋمەن اقىرىنداپ بولسا دا قازىرگى تاڭدا بۇل پروتسەسس ءجۇرىپ جاتىر.
وسى جەردە تۇسىنىسپەۋشىلىك تە بار. جالپى ءبىزدىڭ قوعامداعى اڭگىمەنىڭ اۋانى مايدا، ۇساق اڭگىمەنىڭ دەڭگەيىنەن شىعا المايدى. تەحنولوگيا، جاڭالىق اشۋ قازاققا قاتىسى جوق دۇنيە سەكىلدى. ەرتەڭ يلون ماسك مارسقا ۇشىپ بارسا قازاق "ەەە، بارىپتى عوي" دەيدى دە ءوزىنىڭ قازانىنا ساي كەلەتىن تاقىرىپقا قايتا ءتۇسىپ، سونى قاۋجاپ وتىرا بەرەدى. وسىنداي ۇساق تاقىرىپتاردى ەلدىڭ الدىندا جۇرگەن زيالىلاردىڭ ءوزى باستايدى. سەبەبى ولاردىڭ ءوزى، جالپى ءبىزدىڭ ءبارىمىزدىڭ دەڭگەيىمىز سول نەگىزى. بىلسەك ايتامىز، بىلمەسەك نە ايتامىز؟.. قولدان كەلسە جاسايمىز. كەلمەسە نە جاسايمىز؟.. ادامزاتتىڭ دامۋى، وركەنيەتتىڭ بەتالىسى بىزگە قاجەتى جوق دۇنيە سەكىلدى قابىلدايمىز. ءبىزدىڭ تاقىرىپ ەمەس دەگەن بەيسانالى تۇيسىك جاۋلاپ العان. وسى رامكادان شىعا المايمىز. ءدال وسىلاي كەتە بەرسەك "ۆەچنو دوگونيايۋششي ەكونوميكاسى" بار ەل قاتارىنان ماڭگى شىقپايمىز. ارى قاراي ەكونوميكا، تاۋەلسىز مەملەكەت، ماڭگىلىك ەل دەگەنىڭنىڭ ءوزى عىلىمى مىقتى ورىس پەن قىتايدىڭ ورتاسىندا وتىرعان ءبىز ءۇشىن ۇلكەن سۇراق. ءبىر زاماندا ءبىزدىڭ بۋىن نە كەلەر ۇرپاق بۇل پروبلەمامەن بەتپە-بەت كەلەدى.
باۋىرجان سەرىكبايەۆ
"ادىرنا" ۇلتتىق پورتالى
