قوستانايدا توتەنشە جاعداي ەنگىزىلىپ، تۇرعىنداردى ەۆاكۋاتسيالاۋعا دايىندىق جۇرگىزىلۋدە، دەپ حابارلايدى "ادىرنا" ۇلتتىق پورتالى "ناشا گازەتاعا" سىلتەپ.
«قوستانايدا توتەنشە جاعداي ەنگىزىلۋدە. بۇل تۋرالى بۇگىن وتكەن بريفينگتە قالا اكىمى مارات جۇندىباەۆ ءمالىم ەتتى. بۇگىن، 6 ساۋىردە، ءتۇس كەزىندە نەمەسە كەشكە قاراي ودان دا كوپ سۋ اعىنى بولادى دەپ كۇتىلۋدە»، - دەلىنگەن سەنبىدە.
قوستاناي اكىمى سۋ تاسقىنى ايماعىندا تۇراتىن ازاماتتاردى الدىن الا ەۆاكۋاتسيالاۋدى سۇرادى. ەكى كۇندە قوستاناي وبلىسىنىڭ سۋ قويمالارىنا ميلليارد تەكشە مەتر سۋ كەلىپ، اعىزىلۋ باستالدى، بۇل قوستانايدى سۋ باسۋ قاۋپىن ءتوندىردى.
"قوستانايدا قازىر 20-عا جۋىق ەۆاكۋاتسيالىق پۋنكت اشىلدى. كەشە ساياجاي ەلدى مەكەندەرىنەن 218 ادام ەۆاكۋاتسيالاندى، بىراق تەك 6 قالا تۇرعىنى عانا پروفيلاكتيكالىق ەم الۋدا قالدى، قالعاندارى تۋىستارىنا كەتتى. سۋدىڭ شارىقتاۋ شەگى كەشكە جانە تۇندە بولادى دەپ كۇتەمىز. بۇگىن كۇندىز بارلىق پروفيلاكتيكالىق شارالاردى قولعا الۋ قاجەت. تاۋەلسىزدىك العالى بەرى العاش رەت سۋ قويماسى 100 پايىزعا تولىپ وتىر. ەكى كۇندە ميلليارد تەكشە مەترگە جۋىق سۋ كەلدى، بۇلاي بۇرىن سوڭدى بولماعان»، - دەدى اكىم.
قازىرگى ۋاقىتتا، قاراتومار سۋ قويماسىنىڭ شامادان تىس تولىپ كەتۋىنە بايلانىستى، ارتىق سۋدى اعىزۋ سەكۋندىنا 10 تەكشەدەن باستالىپ، 1,5 مىڭ تەكشە مەترگە دەيىن جەتكىزىلدى. ال مۇنىڭ سالدارى قالانىڭ جاعالاۋعا جاقىن اۋماقتارىنا زور قاۋىپ-قاتەر ءتوندىرىپ تۇر. اتاپ ايتقاندا، «دوروجنيك»، «سادوۆود»، «ميچۋرينەتس» باۋ-باقشا قونىستارىن جانە «كولەسنىە ريادى» اۋدانىن سۋ جايلاۋى مۇمكىن.
«اتالعان اۋماقتاردىڭ تۇرعىندارى قۇزىرەتتى ورگاندار ءبىرىنشى تالاپ ەتكەن ساتتەن باستاپ، ۇيىمداسقان تۇردە ەۆاكۋاتسياعا كىرىسۋى كەرەك. بۇل شارادا ەگدە كىسىلەرگە، ءجۇرىس-تۇرىسى قيىن ازاماتتار مەن بالالارعا ەرەكشە كوڭىل ءبولۋ سۇرالادى. الدىن الا قۇجاتتارىڭىز بەن العاشقى قاجەتتىلىگى بار زاتتارىڭىزدى دايارلاپ قويىڭىزدار. سىزدەرگە اۆتوبۋستار جىبەرىلىپ، ولار ەۆاكوپۋنكتتەرگە قاتىنايدى. ۋاقىتشا قونىستاردا اس-اۋقات جانە جاتىن ورىن ازىرلەنگەن»، — دەلىنەدى قالالىق شتاب حابارلاماسىندا.
قوستاناي قالاسى اۋماعىندا تۇرعىنداردى ەۆاكۋاتسيالاۋعا ارنالعان بىرنەشە پۋنكت ازىرلەنىپ قويىلعان. ولار:
— قر ءىىم اكادەمياسىنىڭ جاتاقحاناسى;
— قوستاناي يندۋستريالىق-پەداگوگيكالىق كوللەدجى;
— قوستاناي اۆتوموبيل كولىگى كوللەدجى;
— قوستاناي قىزمەت كورسەتۋ سالالارى كوللەدجى;
— قوستاناي قۇرىلىس كوللەدجى;
— «درۋجبا» پروفيلاكتورياسى;
— № 2 مەكتەپ-ليتسەي سپورت زالى;
— № 14 جببم;
— س. ماۋلەنوۆ اتىنداعى گيمنازيا;
— № 19 جانە № 20 مەكتەپتەر;
— فيزيكا-ماتەماتيكا ليتسەيى.
«قۇرمەتتى قوستانايلىقتار! ەۆاكۋاتسيا كەزىندە دۇربەلەڭگە سالىنباي، قۇقىق قورعاۋ ورگاندارى مەن تج قىزمەتكەرلەرىنىڭ زاڭ جۇزىندەگى بارلىق تالاپتارىن ورىنداۋلارىڭىزدى سۇرايمىز! ەگەر تاسقىن جەڭىل وتەر بولسا، ادامدار قالدىرىپ كەتكەن تۇرعىن ءۇي الاپتارىن ءتارتىپ ساقشىلارى كۇزەتەتىن بولادى»، - دەلىنگەن شتاب ۇندەۋىندە.
