30 مىڭنان استام قازاقستاندىق پەن ەلوردا قوناقتارى لەوناردو دا ۆينچيءدىڭ «ادەمى حانشايىم» — La Bella Principessa تۋىندىسىن تاماشالادى.
ايگىلى سۋرەتشىنىڭ تاڭعاجايىپ كارتيناسى يتاليانىڭ قازاقستانداعى ەلشىلىگى، ForteBank, Mastercard, Scripta Maneant, يتاليانىڭ مادەنيەت ينستيتۋتى مەن قر مادەنيەت جانە اقپارات مينيسترلىگىنىڭ كۇش-جىگەرىنىڭ ارقاسىندا استاناداعى ۇلتتىق مۋزەيگە قويىلدى.
كورمەنى ەڭ العاشقى بوپ پرەزيدەنت قاسىم-جومارت توقاەۆ تاماشالادى. اقوردانىڭ حابارلاۋىنشا، مەملەكەت باسشىسى ماۋسىم ايىنىڭ باسىندا ۇلتتىق مۋزەيگە بارىپ، وتاندىق جانە الەمدىك بەينەلەۋ ونەرى تۋىندىلارىن كورىپ قايتقان. سونداي-اق پرەزيدەنتكە La Bella Principessa كارتيناسى كورسەتىلدى.
كورمەنىڭ اشىلۋى ۇلتتىق مۋزەيدىڭ ون جىلدىق مەرەيتويىمەن جانە كارتينانىڭ 528-ءشى تۋعان كۇنىمەن تۇسپا-تۇس كەلدى.
استانادا كورمەن وتكىزۋ يدەياسىن يتاليانىڭ قازاقستانداعى ەلشىسى ماركو البەرتي ۇسىنعان ەدى. La Bella Principessa
شوۋىنا دايىندىق التى ايعا سوزىلدى، ال دا ءۆينچيدىڭ كارتيناسىن ساقتاندىرۋ قۇنى شامامەن 200 ميلليون ەۋرونى قۇرايدى.
La Bella Principessa – لەوناردو دا ءۆينچيدىڭ XV عاسىردىڭ اياعىندا سالعان تۋىندىسى، وندا يتالياندىق اقسۇيەكتەر وتباسىنان شىققان جاس قىزدىڭ پورترەتى بەينەلەنگەن. سۋرەتشىنىڭ جۇمىسى بۇكىل الەم بويىنشا بەس رەت قانا كورمەگە قويىلدى.
ۇيىمداستىرۋشىلاردىڭ پىكىرىنشە، كورمە — ەلوردادا دا ۆينچي كارتيناسىن كورسەتۋ مۇمكىندىگى عانا ەمەس، سونىمەن قاتار قازاقستان مەن يتاليا اراسىنداعى مادەني بايلانىس پەن الماسۋدى دامىتۋعا جاسالعان قادام
ايگىلى سۋرەتشىنىڭ شەدەۆرىن كورۋگە ساناۋلى كۇندەر قالدى. كورمە 4 تامىزعا دەيىن جالعاسادى. سەنبى جانە جەكسەنبى كۇندەرى قر ۇلتتىق مۋزەيى ساعات 10:00-دەن 18:00-گە دەيىن، كاسسا ساعات 17:00-گە دەيىن جۇمىس ىستەيدى.
