ءبىر توپ بەلسەندى «قازاق باتىرلارى ءدىن ءۇشىن سوعىستى» دەپ مالىمدەمە جاساعان تانىمال ازىلكەش عالىمجان قۇرمانبەكتىڭ پىكىرىنە زاڭدىق تۇرعىدا باعا بەرۋدى سۇراپ، پرەزيدەنتكە ۇندەۋ جاسادى. بۇل تۋرالى Democrat.kz جازدى، دەپ حابارلايدى «ادىرنا» ءتىلشىسى.
«پرەزيدەنت قاسىم-جومارت كەمەلۇلى توقاەۆقا! باس پروكۋرور اسىلوۆ بەرىك نوعايۇلىنا! ۇلتتىق قاۋىپسىزدىك كوميتەتىنىتوراعاسى ساعىمباەۆ ەرمەك الدابەرگەنۇلىنا!
قازاقستان ازاماتى عالىمجان قۇرمانبەك نۇر-مۇباراك ۋنيۆەرسيتەتىندە وتكەن ءبىر ءىس-شارادا «قاراساي، قابانباي، بوگەنباي باتىرلارىمىز جەر ءۇشىن ەمەس، ءدىن ءۇشىن سوعىستى» دەپ تاريحتى بۇرمالاپ، قازاقستاندا تىيىم سالىنعان ءال-قاعيدا، يگيل، تاليبان جانە تاعى دا باسقا ەكسترەميستىك توپتاردىڭ ريتوريكاسىن دالمە-ءدال قايتالادى.
تاريح بويىنشا قازاقتىڭ بارلىق باتىرى ارقاشان جەرى مەن وتانىن قورعاۋ جولىندا قانىن توككەنىن جوققا شىعاراتىن عالىمجان قۇرمانبەكتىڭ اشىقتان اشىق تەرروريزمدى كوپە-كورىنەۋ بۇلاي جاريا فورمادا ناسيحاتتاۋى تۇتاس قازاق ۇلتىنىڭ رەنىشىن تۋدىردى.
ونىڭ بۇل ءسوزى قىلمىستىق كودەكستىڭ 256 بابى، ياعني تەرروريزمدى اشىق ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ بولىپ سانالادى. اتاپ ايتقاندا، عالىمجان قۇرمانبەك «باتىرلارىمىز ءدىن ءۇشىن سوعىستى» دەي وتىرىپ، جاستاردى ءدىن ءۇشىن سوعىسقا اشىق ۇندەپ وتىر. مۇنان بولەك، ونىڭ بۇل سوزدەرى — قازاق تاريحىن، قازاق ۇلتىن قورلاۋ. ءمورى باسىلعان، دالەل-دەرەكتەرى بار شىنايى تاريحىمىزدىڭ باتىر تۇلعالارىن «ءدىن ءۇشىن سوعىستى» دەۋ — جالعان اقپارات. جاستاردىڭ ساناسىنا مۇنداي جالعان اقپاراتتى قۇيىپ، «ءدىن ءۇشىن» سوعىسقا ۇندەۋ اتا زاڭىمىزداعى تەرروريزم بابىنا سايكەس كەلەدى.
اتالعان ماسەلە بويىنشا تەز ارادا قۇقىقتىق باعا بەرىپ، عالىمجان قۇرمانبەكتى زاڭ الدىندا جاۋاپقا تارتۋدى سۇرايمىز. قازاقستان — زايىرلى مەملەكەت. قازاقستان — اتادان-بالاعا ميراس بولعان تاريحى بار تاۋەلسىز، قۇقىقتىق مەملەكەت. قازاقستاننىڭ باتىرلارىنا ءتىل تيگىزۋگە، ەلىمىزدىڭ تاريحىن بۇرمالاپ، جالعان اقپارات تاراتۋعا ەشكىمنىڭ دە قاقىسى جوق. قازاقتىڭ تاريحىن بۇرمالاۋ — قازاق ۇلتىنا جاسالعان قاستاندىق دەپ بىلەمىز. قۇرمەتپەن قوعام بەلسەندىسى مۇقىشەۆا نۇرگۇل تازابەكقىزى جانە ءبىر توپ قازاقستان ازاماتتارى»،—دەلىنگەن ۇندەۋدە.
ەسكە سالايىق، بۇعان دەيىن عالىمجان قۇرمانبەك يمانسىز ۇرپاققا جەردىڭ كەرەك ەمەس ەكەنىن ايتقان ەدى.