ورالدا مەملەكەتتىك تۇرعىن ءۇي قورىنان پاتەر بەرۋ ماسەلەسى بويىنشا داۋ شىقتى، دەپ حابارلايدى «ادىرنا» ءتىلشىسى uralskweek.kz-كە سىلتەمە جاساپ.
2023 جىلدىڭ 13 شىلدەسىندە الميرا قاراساەۆانىڭ سترويتەل شاعىناۋدانىندا ورنالاسقان ءبىر بولمەلى پاتەردى الۋ جايلى ءوتىنىشى 6 كۇن ىشىندە قارالعان. تەكسەرىس بارىسىندا ايەلدىڭ ادىلەت باسقارماسىنىڭ قىزمەتكەرى، ءارى سول ۋاقىتتا تكش سەكتورىن باسقارعان ءاليحان مىڭجاساروۆتىڭ زايىبى ەكەنى انىقتالدى.
«ادەتتە ءۇي الۋ ءۇشىن ازاماتتار بىرنەشە اي بويى جۇرەدى. رەسمي مالىمەتتەرگە سايكەس، قازىر ورالدا تۇرعىن ءۇي كەزەگىندە 21 مىڭنان استام ادام تۇر. ونىڭ ىشىندە الەۋمەتتىك جاعدايى تومەن ادامدار، كوپبالالى وتباسىلار مەن بالالار ءۇيى تاربيەلەنۋشىلەرى دە بار. ال الميرا قاراساەۆانىڭ ءوتىنىشى قىسقا ۋاقىتتا قارالعان. وتىنىشكە سول كەزدەگى تكش ءبولىمىنىڭ جەتەكشىسى ازامات حالەلوۆ قول قويسا، كەلىسىمدى اكىم ورىنباسارى جاندوس دۇيسەنعاليەۆ بەكىتكەن. ءوتىنىشتى ورىنداۋشى سول ۋاقىتتا تكش سەكتورىن باسقارىپ وتىرعان ءاليحان مىڭجاساروۆ بولعان، ول الميرا قاراساەۆانىڭ زاڭدى جۇبايى ەدى. ول وتىنىشكە ءوزىنىڭ جۇبايى جايلى اقپارات قوسپاپتى»،–دەپ جازدى جەرگىلىكتى باسىلىم.
الميرا قاراساەۆا قازىرگى ۋاقىتتا ءاليحان مىڭجاساروۆپەن اجىراسىپ جاتقانىن حابارلادى. ال قالا اكىمدىگى ءسوز بولىپ وتىرعان پاتەردىڭ اكىمدىك بالانسىندا ەكەنىن، ءۇيدى العان مەملەكەتتىك قىزمەتكەردىڭ تەك كوممۋنالدىق تولەمدەردى تولەۋ كەرەكتەگىن مالىمدەدى.
