بۇگىن، 30 شىلدەدە وزبەكستاندا حالىقتار دوستىعى كۇنى تويلانىپ جاتىر، دەپ حابارلايدى «ادىرنا» ءتىلشىسى.
ەل پرەزيدەنتى شاۆكات ميرزيەەۆ وتانداستارىن مەرەكەمەن قۇتتىقتادى.
«وزبەكستاندا 130-دان استام ۇلت پەن ۇلىستىڭ، 16 كونفەسسيانىڭ وكىلى تاتۋ-ءتاتتى ءومىر ءسۇرىپ جاتىر. ەلىمىزدە 38 دوستىق قوعامى مەن 157 ۇلتتىق مادەني ورتالىق جۇمىس ىستەيدى. مەملەكەت ولاردى ءتيىستى جابدىقتارمەن، جيھازدارمەن، مۋزىكالىق اسپاپتارمەن جانە ۇلتتىق كيىمدەرمەن قامتاماسىز ەتىپ وتىر. ءبىلىم بەرۋ مەكەمەلەرىندە وقىتۋ وزبەك، قاراقالپاق، ورىس، تاجىك، قازاق، قىرعىز جانە تۇرىكمەن تىلدەرىندە جۇرگىزىلىپ جاتىر»،—دەدى ول.
مەملەكەت باسشىسى ەلدەگى ءوزارا سىيلاستىق، كەلىسىم مەن ىنتىماقتاستىق اتموسفەراسىن نىعايتۋدىڭ ماڭىزدى ەكەنىن ايتتى. سونداي-اق جاستاردى جات دەسترۋكتيۆتى يدەيالار مەن اعىمداردان قورعاۋ جۇمىستارىن جاڭا دەڭگەيگە كوتەرۋ قاجەتتىگىن مالىمدەدى.
مەرەكەلىك كۇن 2021 جىلى پرەزيدەنت شاۆكات ميرزيەەۆتىڭ قاۋلىسىمەن رەسمي تۇردە بەكىتىلگەن ەدى. قازىرگى تاڭدا وزبەكستاندا 821,2 مىڭ قازاق ءومىر ءسۇرىپ جاتىر.
