Búgin, 30 shildede Ózbekstanda halyqtar dostyǵy kúni toılanyp jatyr, dep habarlaıdy «Adyrna» tilshisi.
El prezıdenti Shavkat Mırzıeev otandastaryn merekemen quttyqtady.
«Ózbekstanda 130-dan astam ult pen ulystyń, 16 konfessııanyń ókili tatý-tátti ómir súrip jatyr. Elimizde 38 dostyq qoǵamy men 157 ulttyq mádenı ortalyq jumys isteıdi. Memleket olardy tıisti jabdyqtarmen, jıhazdarmen, mýzykalyq aspaptarmen jáne ulttyq kıimdermen qamtamasyz etip otyr. Bilim berý mekemelerinde oqytý ózbek, qaraqalpaq, orys, tájik, qazaq, qyrǵyz jáne túrikmen tilderinde júrgizilip jatyr»,—dedi ol.
Memleket basshysy eldegi ózara syılastyq, kelisim men yntymaqtastyq atmosferasyn nyǵaıtýdyń mańyzdy ekenin aıtty. Sondaı-aq jastardy jat destrýktıvti ıdeıalar men aǵymdardan qorǵaý jumystaryn jańa deńgeıge kóterý qajettigin málimdedi.
Merekelik kún 2021 jyly prezıdent Shavkat Mırzıeevtiń qaýlysymen resmı túrde bekitilgen edi. Qazirgi tańda Ózbekstanda 821,2 myń qazaq ómir súrip jatyr.
