بۇگىن - ساۋدا قىزمەتكەرلەرى كۇنى، دەپ حابارلايدى “ادىرنا” ۇلتتىق پورتالى.
جىل سايىن شىلدەنىڭ ءتورتىنشى جەكسەنبىسىندە اتالىپ وتىلەتىنىن بۇل مەرەكە وسى سالادا ەڭبەك ءسىڭىرىپ جۇرگەن ساۋدا قىزمەتكەرلەرىن قۇرمەتكە بولەپ كەلەدى.
كاسىبي مەرەكەگە وراي ساۋدا جانە ينتەگراتسيا ءمينيسترى ارمان شاققاليەۆ بارشا كاسىپكەرلەردى قۇتتىقتادى.
“قۇرمەتتى ساۋدا قىزمەتكەرلەرى!
سىزدەردى بۇگىنگى كاسىبي مەرەكە - ساۋدا قىزمەتكەرلەرى كۇنىمەن شىن جۇرەكتەن قۇتتىقتايمىن!
ساۋدا – ءار ەلدىڭ ەكونوميكاسىنداعى، حالىقارالىق قاتىناستاعى ماڭىزدى سالا. ساۋدا جانە ينتەگراتسيا مينيسترلىگى ءوزىنىڭ قىسقا تاريحىندا تاباندى جانە ناتيجەلى ەڭبەك ەتىپ، ەل ۇكىمەتى تاراپىنان قويىلعان مىندەتتى مەجەلەرگە قول جەتكىزىپ كەلەدى.
نەبارى 5 جىلدىڭ ىشىندە ىشكى ساۋدا اينالىمى 60 پايىزعا ارتتى. ال سىرتقى تاۋار اينالىمى 43 پايىزعا ءوستى. تاۋارلار ەكسپورتى 2023 جىلى 35 پايىزعا ۇلعايدى.
قازىر ساۋدا سالاسىندا ءبىر جارىم ميلليوننان استام قازاقستاندىق قىزمەت ەتەدى.
ءبىزدىڭ مينيسترلىك قۇرىلعاننان بەرى وتاندىق كومپانيالار مەن وندىرۋشىلەر ەلەكتروندى ساۋدا تەتىكتەرىن مەڭگەرىپ، الەمدىك ەلەكتروندى ساۋدا الاڭدارىنا شىعا باستادى. سونىڭ ارقاسىندا وسى سالادا قىزمەت ەتەتىن ازاماتتاردىڭ سانى ءوستى.
الەۋمەتتىك ماڭىزى بار ازىق-تۇلىك باعالارىن تۇراقتاندىرۋدا ءتيىمدى شەشىمدەر قابىلدانىپ، باعا مونيتورينگى قالىپتاستى. سونىڭ ناتيجەسىندە ەلىمىزدە سوڭعى 8 جىلدا باعا دەفلياتسياسى تىركەلدى. جاقىندا بولعان قىتاي باسشىسىنىڭ ەلىمىزگە ساپارى اياسىندا قىتايمەن ساۋدا-ىنتىماقتاستىق تۋرالى ماڭىزدى قۇجاتقا قول جەتكىزدىك. بۇل قۇجات الەمدەگى الپاۋىت دەرجاۆامەن اشىق ساۋدا جاساۋعا مۇمكىندىك بەرە وتىرىپ، الەمدىك ارەنادا قازاقستاننىڭ ساۋدا-ساتتىق پوتەنتسيالىنىڭ جوعارى ەكەنىن دالەلدەي ءتۇستى. وسى ورايدا يرانمەن، سينگاپۋرمەن جانە سەربيامەن ماڭىزدى ەركىن ساۋدا كەلىسىمدەرىن جاساعانىمىزدى دا ايتا كەتكەن ابزال.
الەمدىك ەكونوميكا ءبىر ورنىندا تۇرمايدى. سوندىقتان ساۋدا سالاسىن ءارى قاراي دامىتۋ، سالاداعى كورسەتكىشتەردى ەسەلەۋ، جاڭا تەندەنتسيالارعا ساي جۇمىس جۇرگىزۋ، ەلىمىزدىڭ ساۋدا ساياساتىن مىعىمداۋ،ساۋدانىڭ الەۋەتىن ارتتىرۋ – الدىمىزدا تۇرعان ۇلكەن مىندەت. ال ەلدىك مىندەتتى ەشكىم جالعىز اتقارمايدى. مۇنداي جۇگى اۋىر جاۋاپكەرشىلىكتى سىزدەرمەن بىرگە اتقارامىز.
وسىنداي ايتۋلى كۇندە بارشا سالا قىزمەتكەرلەرىنە دەگەن زور ريزاشىلىعىم مەن العىسىمدى بىلدىرۋگە رۇقسات ەتىڭىزدەر. دەندەرىڭىزگە ساۋلىق، مۇقالماس ەرىك-جىگەر، وتباسىڭىزعا باق-بەرەكە تىلەيمىن!
كاسىبي مەرەكە قۇتتى بولسىن!” - دەدى مينيستر ءوز جازباسىندا.
