ءبىر ايدان كەيىن جاڭا وقۋ جىلى باستالادى. ءۇش اي دەمالىستان كەيىن جاڭا وقۋ جىلىنداعى جۇمىسىنا جاڭا سەرپىنمەن كىرىسۋگە ءتيىس ۇستازدار تاعى دا ءشوپ جۇلۋعا جەگىلىپتى. مۇعالىمنىڭ ءشوپ جۇلىپ، كوشە سىپىرۋعا ءوز ەركىمەن شىقپايتىنىن، ءماجبۇرلى تۇردە جەگىلەتىنى جۇرتقا ايان. مۇعالىمدى مۇنداي قارا جۇمىس تۇرىنە سالۋ زاڭعا تومپاق ەكەنى تالاي ايتىلىپ، جازىلدى. وكىنىشكە قاراي، كورەر كوزگە تۇرپايى كورىنىس بيىل دا جالعاستى.
فەيسبۋك الەۋمەتتىك جەلىسىندە شىعىسقازاقستاندىق ۇستاز مەيىرجان تەمىربەك وسىنداي ولقى جاعداي تۋرالى ايتىپ، «قازاقستاننىڭ ءبىلىم تۋرالى زاڭىندا ۇستازدار 1 تامىز نۇسقاۋ حات، ادىستەمەلىك قۇرال ت.ب مەكتەپتەرگە تاراتىلىپ مۇعالىمدەر قىركۇيەككە دەيىن بارلىق قۇجاتتارىن جوندەۋى كەرەك. ال بىزدە ديرەكتورلار ونى تۇگەندەۋدىڭ ورنىنا، ونى ءتيىستى ورگانداردان سۇراۋدىڭ ورنىنا ءشوپ جۇلدىرىپ ءجۇر. مەكتەپ ديرەكتورى زاۆحوزعا اينالعان» دەپ وزگە ايماق مۇعالىمدەرىنەن كەلگەن حابارلارمەن ءبولىستى. جاريالانعان اقپاراتتاردان تۇيگەنىمىز، ەلىمىزدىڭ بىرنەشە ايماعىندا مۇعالىمدەر ءشوپ جۇلۋعا ەرىكسىز شىعارىلعان. مۇعالىمدەردىڭ ءشوپ جۇلۋى تۋرالى اقپارات وسى سالا ماماندارىنىڭ نارازىلىعىن تۋدىردى. ايتسە دە، ادەتتەگىدەي نارازى توپقا قارسى پىكىر ءبىلدىرۋشى دە تابىلدى. «ۇستاز بالا وقىتۋمەن اينالىسسىن» دەگەن پايىمعا جاينا سامەتوۆا اتتى الەۋمەتتىك جەلى قولدانۋشى: «مەكتەپ ءوزىڭنىڭ نəپاقا تاۋىپ، جۇمىس ىستەپ وتىرعان ورتاڭ بولعان سوڭ ءوز وتىرعان ورنىڭ مەن ماڭايىڭدى تازا ۇستاعاندا تۇرعان نە بار؟ ءوز وقىتىپ وتىرعان وقۋشىلارىڭا ۇلگى-ونەگە كورسەتۋگە تاعى دا مۇمكىندىك جاسايتىن از-ماز شارۋانى جارياعا جار سالماي-اق ىستەۋگە بولادى عوي. جازىلمايتىن زاڭدار بار. قۇس ەكەش قۇس تا ءوز ۇياسىن ءوزى جاساپ، ىشىندەگى زيانكەس دۇنيەلەردى تازالاپ وتىرادى عوي. بۇل ءسوزىڭدى وقۋشىلارىڭ وقىسا، ولاردىڭ قالاي قوعامدىق كوزقاراسىن دامىتاسىڭ، قوعامدىق ەڭبەككە قالاي تəربيەلەيسىڭ؟ ول مەنىڭ شارۋام ەمەس دەيسىڭ بە؟ وسىدان ۇجىمدا ىنتىماقتاستىققا قالاي جۇزەگە اسادى؟ ءبىرىڭ ويعا، ءبىرىڭ قىرعا تارتىپ وتىرساڭدار. مايدالانىپ زاڭ-زəكۇندى تەرمەلەگەنشە جىگىتتىك باستاماشىلدىق كورسەتسەڭ ەتتى. شوشقا عانا ءوز ورنىن لاستاپ، بىلىعىپ جاتادى. ال ادام، ونىڭ ىشىندە مۇعالىم بولعان سوڭ بولماشى نəرسەدەن داۋ شىعارعان ۇيات قوي. ودان گورى فب-عا ءبىر ۇلگىلى ساباعىڭدى سالساڭ، نە تəجىريبەڭمەن بولىسسەڭ əلدەقايدا پايدالىراق بولار ەدى» دەپ پىكىر ءبىلدىردى.
ءيا، مەكتەپ ءار مۇعالىمنىڭ جالاقى الىپ وتىرعان جەرى ەكەنى راس. الايدا مەكتەپتەن بەرىلەتىن جالاقى مۇعالىمنىڭ ءپان ساعاتىنا، ەڭبەك وتىلىنە، بىلىكتىلىگىنە قاراي ولشەنىپ، ەسەپتەلىپ بەرىلەدى. قازاقستاننىڭ ەشبىر مەكتەبىندە مۇعالىم كوشە سىپىرىپ، ءشوپ شاۋىپ ارتىق ايلىق العان ەمەس، المايدى دا. سوعان قاراماستان، ءشوپ شابۋ، كوشە سىپىرۋدى قوعامدىق ەڭبەكپەن ساباقتاستىرىپ، ءتىپتى وقۋشىعا سونى ۇلگى ەتۋدى ۇسىنۋ قانشالىقتى قيسىندى؟ وقۋشى دال-دۇلى شىعىپ، كوشە سىپىرىپ جۇرگەن مۇعالىمدى سىيلاي ما، الدە مۇنتازداي تازا كيىنىپ، ءوز ءپانىن تەرەڭنەن وقىتىپ، ۇيرەتەتىن مۇعالىمدى سىيلاي ما؟
جاينا سامەتوۆانىڭ پىكىرىمەن كەلىسپەيتىنىن ءبىلدىرىپ، بىرنەشە ۇستاز ءوز ويىمەن ءبولىستى. ايتسە دە، ولارعا «قوعامدى وزگەرتۋگە ۇسىنىسىڭ بار ما؟» دەگەن ساۋالمەن جاينا اپايىمىز ماسەلەدەن شەتكە اۋعانداي كورىندى. قوعامدى وزگەرتۋگە ۇسىنىستى ميلليونداپ جاساۋعا بولادى. بىراق سول ۇسىنىس وزىنە سور بولىپ، تەمىر توردىڭ ارعى جاعىنان ءبىر-اق شىعاراتىنىن ۇستاز تۇگىلى، ويىن بالاسى دا بىلەدى عوي!؟ بۇل جەردەگى نەگىزگى ماسەلە – مۇعالىمدى ەركىنەن تىس قارا جۇمىسقا جەگۋ تۋرالى. بۇعان قاتىستى زاڭ نە دەيدى؟ مەكتەپ ناپاقاڭدى الىپ جۇرگەن جەرىڭ، سوندىقتان ءشوبىن دە جۇلاسىڭ، ءىشى-سىرتىن دا جۋىپ-شاياسىڭ دەي مە؟ «قۇداي بەتىن ارى قىلسىن، ءشوپ جۇلىپ جۇرگەندە جاندىك شاعىپ السا، وندىرىستىك جاراقاتقا جاتا ما؟ ءبىراز جىل بۇرىن مەكتەپتىڭ جىلىتۋ جۇيەسىن جوندەپ ءجۇرىپ مۇعالىم قايتىس بولدى. مەكتەپتىڭ توبەسىن جوندەپ جۇرگەن مۇعالىم گۋدرونعا بەتىن كۇيدىردى. سپورتتىق جارىسقا بارا جاتقان مۇعالىم اۆارياعا ءتۇستى وقۋشىلارمەن. ءبارى باستارىن الا قاشتى. كىنالى مۇعالىم بولىپ شىقتى. قولدان جاسالعان گاز سۆاركانى پايدالانعان، مەملەكەتتىك كولىكپەن سوپراۆوجدەنيەمەن اپارماعان دەگەن «دياگنوزدار» قويىلدى. باستىسى وقۋشى مەن مۇعالىمنىڭ قاۋىپسىزدىگى. ايتپەسە ءشوپ جۇلماق تۇگىلى پولىن جۋىپ، وتىمەن شىعىپ، كۇلىمەن كىرىپ كۇڭ بولساڭىزدار دا وزدەرىڭىزدىڭ شارۋالارىڭىز»، – دەيدى ۇستازداردىڭ قۇقىقتىق ساۋاتىنا رەنىش بىلدىرگەن مەيىرجان تەمىربەك.
مەرۋەرت حۋساينوۆا
"ادىرنا" ۇلتتىق پورتالى
