Bir aıdan keıin jańa oqý jyly bastalady. Úsh aı demalystan keıin jańa oqý jylyndaǵy jumysyna jańa serpinmen kirisýge tıis ustazdar taǵy da shóp julýǵa jegilipti. Muǵalimniń shóp julyp, kóshe sypyrýǵa óz erkimen shyqpaıtynyn, májbúrli túrde jegiletini jurtqa aıan. Muǵalimdi mundaı qara jumys túrine salý zańǵa tompaq ekeni talaı aıtylyp, jazyldy. Ókinishke qaraı, kórer kózge turpaıy kórinis bıyl da jalǵasty.
Feısbýk áleýmettik jelisinde shyǵysqazaqstandyq ustaz Meıirjan Temirbek osyndaı olqy jaǵdaı týraly aıtyp, «Qazaqstannyń Bilim týraly zańynda ustazdar 1 tamyz nusqaý hat, ádistemelik qural t.b mektepterge taratylyp muǵalimder qyrkúıekke deıin barlyq qujattaryn jóndeýi kerek. Al bizde dırektorlar ony túgendeýdiń ornyna, ony tıisti organdardan suraýdyń ornyna shóp juldyryp júr. Mektep dırektory zavhozǵa aınalǵan» dep ózge aımaq muǵalimderinen kelgen habarlarmen bólisti. Jarııalanǵan aqparattardan túıgenimiz, elimizdiń birneshe aımaǵynda muǵalimder shóp julýǵa eriksiz shyǵarylǵan. Muǵalimderdiń shóp julýy týraly aqparat osy sala mamandarynyń narazylyǵyn týdyrdy. Áıtse de, ádettegideı narazy topqa qarsy pikir bildirýshi de tabyldy. «Ustaz bala oqytýmen aınalyssyn» degen paıymǵa Jaına Sametova atty áleýmettik jeli qoldanýshy: «Mektep ózińniń nəpaqa taýyp, jumys istep otyrǵan ortań bolǵan soń óz otyrǵan ornyń men mańaıyńdy taza ustaǵanda turǵan ne bar? Óz oqytyp otyrǵan oqýshylaryńa úlgi-ónege kórsetýge taǵy da múmkindik jasaıtyn az-maz sharýany jarııaǵa jar salmaı-aq isteýge bolady ǵoı. Jazylmaıtyn zańdar bar. Qus ekesh qus ta óz uıasyn ózi jasap, ishindegi zııankes dúnıelerdi tazalap otyrady ǵoı. Bul sózińdi oqýshylaryń oqysa, olardyń qalaı qoǵamdyq kózqarasyn damytasyń, qoǵamdyq eńbekke qalaı tərbıeleısiń? Ol meniń sharýam emes deısiń be? Osydan ujymda yntymaqtastyqqa qalaı júzege asady? Biriń oıǵa, biriń qyrǵa tartyp otyrsańdar. Maıdalanyp zań-zəkúndi termelegenshe jigittik bastamashyldyq kórsetseń etti. Shoshqa ǵana óz ornyn lastap, bylyǵyp jatady. Al adam, onyń ishinde muǵalim bolǵan soń bolmashy nərseden daý shyǵarǵan uıat qoı. Odan góri FB-ǵa bir úlgili sabaǵyńdy salsań, ne təjirıbeńmen bólisseń əldeqaıda paıdalyraq bolar edi» dep pikir bildirdi.
Iá, mektep ár muǵalimniń jalaqy alyp otyrǵan jeri ekeni ras. Alaıda mektepten beriletin jalaqy muǵalimniń pán saǵatyna, eńbek ótiline, biliktiligine qaraı ólshenip, eseptelip beriledi. Qazaqstannyń eshbir mektebinde muǵalim kóshe sypyryp, shóp shaýyp artyq aılyq alǵan emes, almaıdy da. Soǵan qaramastan, shóp shabý, kóshe sypyrýdy qoǵamdyq eńbekpen sabaqtastyryp, tipti oqýshyǵa sony úlgi etýdi usyný qanshalyqty qısyndy? Oqýshy dal-duly shyǵyp, kóshe sypyryp júrgen muǵalimdi syılaı ma, álde muntazdaı taza kıinip, óz pánin tereńnen oqytyp, úıretetin muǵalimdi syılaı ma?
Jaına Sametovanyń pikirimen kelispeıtinin bildirip, birneshe ustaz óz oıymen bólisti. Áıtse de, olarǵa «qoǵamdy ózgertýge usynysyń bar ma?» degen saýalmen Jaına apaıymyz máseleden shetke aýǵandaı kórindi. Qoǵamdy ózgertýge usynysty mıllıondap jasaýǵa bolady. Biraq sol usynys ózine sor bolyp, temir tordyń arǵy jaǵynan bir-aq shyǵaratynyn ustaz túgili, oıyn balasy da biledi ǵoı!? Bul jerdegi negizgi másele – muǵalimdi erkinen tys qara jumysqa jegý týraly. Buǵan qatysty zań ne deıdi? Mektep nápaqańdy alyp júrgen jeriń, sondyqtan shóbin de julasyń, ishi-syrtyn da jýyp-shaıasyń deı me? «Qudaı betin ary qylsyn, shóp julyp júrgende jándik shaǵyp alsa, óndiristik jaraqatqa jata ma? Biraz jyl buryn mekteptiń jylytý júıesin jóndep júrip muǵalim qaıtys boldy. Mekteptiń tóbesin jóndep júrgen muǵalim gýdronǵa betin kúıdirdi. Sporttyq jarysqa bara jatqan muǵalim avarııaǵa tústi oqýshylarmen. Bári bastaryn ala qashty. Kináli muǵalim bolyp shyqty. Qoldan jasalǵan gaz svarkany paıdalanǵan, memlekettik kólikpen sopravojdenıemen aparmaǵan degen «dıagnozdar» qoıyldy. Bastysy oqýshy men muǵalimniń qaýipsizdigi. Áıtpese shóp julmaq túgili polyn jýyp, otymen shyǵyp, kúlimen kirip kúń bolsańyzdar da ózderińizdiń sharýalaryńyz», – deıdi ustazdardyń quqyqtyq saýatyna renish bildirgen Meıirjan Temirbek.
Merýert HÝSAINOVA
"Adyrna" ulttyq portaly
