بۇگىن — قازاقتىڭ قوس عارىشكەرى توقتار اۋباكىروۆ پەن ايدىن ايىمبەتوۆتىڭ تۋعان كۇنى، دەپ حابارلايدى «ادىرنا» ءتىلشىسى.
سوۆەت وداعىنىڭ باتىرى، كسرو ۇشقىش-عارىشكەرى، قازاقستاننىڭ ۇشقىش-عارىشكەرى، قازاقستان رەسپۋبليكالىق حالىق قاھارمانى توقتار اۋباكىروۆ 78-كە تولسا، قازاقستاننىڭ ۇشقىش-عارىشكەرى، قازاقستاننىڭ حالىق قاھارمانى ايدىن ايىمبەتوۆ 52 جاسقا كەلىپ وتىر.
تۇڭعىش عارىشكەر توقتار اۋباكىروۆ 1946 جىلى 27 شىلدەدە قاراعاندى وبلىسىنىڭ قارقارالى اۋدانىندا دۇنيەگە كەلگەن. ول 1991 جىلى 2 قازاندا بايقوڭىردان «سويۋز تم-13» كەمەسىمەن كوككە ۇشقان ەدى. عارىشتا 7 كۇن 22 ساعات 12 مينۋت بولدى. توقتار وڭعاربايۇلى وزگە عارىشكەرلەرمەن بىرگە بيوتەحنولوگيا، مەتاللۋرگيا، مەديتسينا سالالارى جانە ارال تەڭىزى ايماعى بويىنشا عىلىمي-زەرتتەۋ جۇمىستارىن جۇرگىزدى.
تاۋەلسىز قازاقستاننىڭ العاشقى عارىشكەرى ايدىن ايىمبەتوۆ 1972 جىلى 27 شىلدەدە الماتى وبلىسى تالدىقورعان قالاسى وتەناي اۋىلىندا دۇنيەگە كەلگەن. ول 2015 جىلدىڭ قىركۇيەگىندە «سويۋز تما-18م» عارىش كەمەسىنىڭ بورتينجەنەرى بولىپ، حالىقارالىق عارىش ستانتسياسىنا ۇشقان بولاتىن. 10 كۇنگە سوزىلعان ساپاردا ايدىن ايىمبەتوۆ عارىشتاعى 5-ءشى ۇلتتىق عىلىمي زەرتتەۋ باعدارلاماسىن ورىندادى. العاشقى 4 باعدارلاما 1991 جىلى توقتار اۋباكىروۆتىڭ جانە 1994, 1998, 2001 جىلدارى تالعات مۇساباەۆتىڭ عارىشتىق ساپارلارىندا اتقارىلعان ەدى.
ايتا كەتەيىك، عارىشكەرلەردىڭ ەكەۋى دە ارماۆير جوعارى اسكەري اۆياتسيا مەكتەبىن ءبىتىرىپ، اسكەري ۇشقىش، كەيىنىرەك عارىشكەر اتاندى.
