اقتوبە وبلىسى پروكۋراتۋراسىنىڭ عيماراتىن الداعى 5 ايدا كەشەندى تازالاۋعا 15 925 000 تەڭگە قارجى ءبولىندى، دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
"پروكۋراتۋرا ورگاندارىنىڭ اكىمشىلىك عيماراتتارىنا كەشەندى تازالاۋ قىزمەتتەرى" دەگەن تاقىرىپپەن جاريالانعان مەملەكەتتىك ساتىپ الۋ تۋرالى حابارلاما 24 شىلدە كۇنى جاريالاندى. جەڭىمپاز كومپانيا 8 تامىز كۇنى انىقتالادى. تەحنيكالىق سيپاتتامادا تاپسىرىستى ورىنداۋشى 31 جەلتوقسانعا دەيىن، ياعني الداعى 5 ايدا كەڭسە ءۇي-جايلارى مەن كابينەتتەرىن كۇن سايىن جيناپ، جيھاز، كەڭسە تەحنيكاسى، تەلەفوندار، ەسىكتەر جانە باسقا دا ينتەرەر زاتتاردىڭ شاڭىن سۇرتەتىنى، قوقىس سەبەتتەرىن بوساتىپ، پاكەتتەردى اۋىستىرىپ وتىراتىنى، ت.ب جۇمىستار كورسەتىلگەن. سونداي-اق، تاپسىرىستى ورىنداۋشى ءۇي جايدىڭ تازالىعىن قاداعالاۋ ءۇشىن كۇنىنە 1 كەزەكشى تازالاۋشىنى بەكىتۋ كەرەكتىگى جازىلىپتى. ياعني، پروكۋراتۋرا عيماراتىندا ءبىر تازالىقشى كۇن سايىن تاڭعى ساعات 08.00-دەن كەشكى 18.30-عا دەيىن جۇمىس ىستەۋگە مىندەتتەلەدى.
قىزمەتكەرلەرگە قىزمەتتىك ءۇيجايلاردى تازالاۋ نەمەسە جيناۋ سالاسىنداعى جۇمىس تاجىريبەسىنىڭ بولۋى; جۋعىش زاتتارمەن جۇمىس ىستەي ءبىلۋى; قاۋىپسىزدىك ەرەجەلەرىن جانە سانيتارلىق نورمالاردى ءبىلۋ; قۇپيا مالىمەتتەردى جاريالاۋماۋ تۋرالى مىندەتتەمە; ت.ب تالاپتار قويىلاتىنى جازىلعان.
تەحنيكالىق سيپاتتامانى وقىپ شىققاندا ءبىز ءبىر جايدى تۇسىنبەدىك. اقتوبە وبلىسىنىڭ پروكۋراتۋراسى عيماراتىن الداعى 5 ايعا تازالاتۋعا 1 جۇمىسكەردى 15 925 000 تەڭگەگە جالداعالى وتىر ما؟ لوگيكاعا سالىپ قاراعاننىڭ وزىندە تازالىقشى ءبىر كۇن جۇمىس ىستەپ، ەكى كۇن دەمالاتىن جۇمىس كەستەسى بولعاننىڭ وزىندە، ءۇش قىزمەتكەر ءبىر عيماراتتى تازا ۇستاۋىنا ابدەن كۇشى جەتەرى انىق.
15 925 000 تەڭگەنى 5 ايعا بولسەڭىز ايىنا 3 185 000 تەڭگە شىعادى. سوندا پروكۋراتۋرانى ءۇش قىزمەتكەر ايىنا ميلليون تەڭگەدەن اسا جالاقى الىپ تازالاي ما؟ بۇل سۇراقتاردى اقتوبە وبلىسىنىڭ پروكۋراتۋراسىنا جولدادىق. ولاردىڭ جاۋابىن الداعى ۋاقىتتا جاريالايتىن بولامىز.
اقان اسىل
«ادىرنا» ۇلتتىق پورتالى
