Aqtóbe oblysy prokýratýrasynyń ǵımaratyn aldaǵy 5 aıda keshendi tazalaýǵa 15 925 000 teńge qarjy bólindi, dep habarlaıdy Adyrna ulttyq portaly satypalu.gov.kz saıtyna silteme jasap.
"Prokýratýra organdarynyń ákimshilik ǵımarattaryna keshendi tazalaý qyzmetteri" degen taqyryppen jarııalanǵan memlekettik satyp alý týraly habarlama 24 shilde kúni jarııalandy. Jeńimpaz kompanııa 8 tamyz kúni anyqtalady. Tehnıkalyq sıpattamada tapsyrysty oryndaýshy 31 jeltoqsanǵa deıin, ıaǵnı aldaǵy 5 aıda keńse úı-jaılary men kabınetterin kún saıyn jınap, jıhaz, keńse tehnıkasy, telefondar, esikter jáne basqa da ınterer zattardyń shańyn súrtetini, qoqys sebetterin bosatyp, paketterdi aýystyryp otyratyny, t.b jumystar kórsetilgen. Sondaı-aq, tapsyrysty oryndaýshy úı jaıdyń tazalyǵyn qadaǵalaý úshin kúnine 1 kezekshi tazalaýshyny bekitý kerektigi jazylypty. Iaǵnı, prokýratýra ǵımaratynda bir tazalyqshy kún saıyn tańǵy saǵat 08.00-den keshki 18.30-ǵa deıin jumys isteýge mindetteledi.
Qyzmetkerlerge qyzmettik úıjaılardy tazalaý nemese jınaý salasyndaǵy jumys tájirıbesiniń bolýy; jýǵysh zattarmen jumys isteı bilýi; qaýipsizdik erejelerin jáne sanıtarlyq normalardy bilý; qupııa málimetterdi jarııalaýmaý týraly mindetteme; t.b talaptar qoıylatyny jazylǵan.
Tehnıkalyq sıpattamany oqyp shyqqanda biz bir jaıdy túsinbedik. Aqtóbe oblysynyń prokýratýrasy ǵımaratyn aldaǵy 5 aıǵa tazalatýǵa 1 jumyskerdi 15 925 000 teńgege jaldaǵaly otyr ma? Logıkaǵa salyp qaraǵannyń ózinde tazalyqshy bir kún jumys istep, eki kún demalatyn jumys kestesi bolǵannyń ózinde, úsh qyzmetker bir ǵımaratty taza ustaýyna ábden kúshi jeteri anyq.
15 925 000 teńgeni 5 aıǵa bólseńiz aıyna 3 185 000 teńge shyǵady. Sonda prokýratýrany úsh qyzmetker aıyna mıllıon teńgeden asa jalaqy alyp tazalaı ma? Bul suraqtardy Aqtóbe oblysynyń prokýratýrasyna joldadyq. Olardyń jaýabyn aldaǵy ýaqytta jarııalaıtyn bolamyz.
Aqan Asyl
«Adyrna» ulttyq portaly
