كيەۆ ماسكەۋمەن «رەسەي ادال كەلىسسوزدەر جۇرگىزۋگە دايىن بولعان كەزدە» كەلىسسوزدەر پروتسەسىنە كىرىسۋگە دايىن ەكەنىن جەتكىزدى، دەپ حابارلايدى “ادىرنا” ۇلتتىق پورتالى Deutsche Welle سايتىنا سىلتەپ.
بۇل تۋرالى سارسەنبى، شىلدەنىڭ 24-ءى كۇنى ۋكراينا سىرتقى ىستەر ءمينيسترى دميتري كۋلەبا گۋانچجوۋعا ساپارى بارىسىندا قىتايلىق ارىپتەسى ۆان يمەن كەزدەسكەنىندە مالىمدەدى.
كۋلەبانىڭ ايتۋىنشا، قازىرگى تاڭدا رەسەي تاراپىنان مۇنداي دايىندىق جوق.
«شارتتار مەن ۋاقىت ءالى كەلمەسە دە، ءبىز بەيبىتشىلىكتى ىلگەرىلەتۋگە باعىتتالعان بارلىق كۇش-جىگەردى قولدايمىز جانە وسىندا سىندارلى ءرول اتقارۋعا دايىنبىز»، - دەدى قىتاي ءسىم باسشىسى ۆان ي.
كۋلەبا سونىمەن قاتار ۋكراينا تاراپى قىتاي مەن برازيليا 2024 جىلدىڭ مامىر ايىندا ۇسىنعان بەيبىتشىلىك جوسپارىن «مۇقيات زەرتتەگەنىن» ايتتى.
ال رەسەي پرەزيدەنتىنىڭ ءباسپاسوز حاتشىسى دميتري پەسكوۆ بريفينگتە ۋكراينا سىرتقى ىستەر مينيسترلىگى باسشىسىنىڭ سوزدەرىنە تۇسىنىكتەمە بەرە وتىرىپ، ماسكەۋ كيەۆپەن «كەلىسسوزدەردەن ەشقاشان باس تارتپاعانىن» ايتتى.
«جولداۋدىڭ ءوزى ءبىزدىڭ ۇستانىمىمىزبەن ۇندەس دەپ ايتۋعا بولادى، بىلە بىلسەڭىزدەر، رەسەيلىك تاراپ كەلىسسوزدەردەن ەشقاشان باس تارتقان ەمەس، كەلىسسوزدەر پروتسەسىنە اشىقتىعىن ساقتاپ كەلگەن، بىراق بۇل جەردە ءبىز ءالى ناقتىسىن بىلمەيمىز. بۇل ماسەلە بويىنشا ءبىراز تۇسىنىكتەمە كۇتۋ كەرەك»، - دەيدى كرەمل وكىلى.
