ارمەنيا پرەمەر-ءمينيسترى نيكول پاشينيان اسكەردەگى سۋيتسيد پەن جارعىلىق تارتىپكە قايشى قارىم-قاتىناس ماسەلەلەرىمەن اينالىساتىن جۇمىس توبىن قۇردى. ءتيىستى شەشىم ەل ۇكىمەتىنىڭ سايتىندا جاريالاندى، دەپ حابارلايدى «ادىرنا» ءتىلشىسى.
جۇمىس توبىنىڭ قۇرامىنا نەگىزگى كۇشتىك جانە مەملەكەتتىك قۇرىلىمداردىڭ باسشىلارى مەن وكىلدەرى كىرگەن. اتاپ ايتقاندا، قورعانىس، دەنساۋلىق ساقتاۋ، ءبىلىم، عىلىم، مادەنيەت جانە سپورت مينيسترلەرى، قارۋلى كۇشتەر باس شتابىنىڭ باستىعى، قاۋىپسىزدىك كەڭەسىنىڭ حاتشىسى، ىشكى ىستەر ءمينيسترىنىڭ ورىنباسارلارى، ۇلتتىق قاۋىپسىزدىك قىزمەتى مەن باس پروكۋراتۋرا باسشىلارىنىڭ وكىلدەرى، اسكەري پوليتسيا باستىعى جانە باسقا دا لاۋازىمدى تۇلعالار بار. بارلىعى جۇمىس توبىنا 11 ادام ەنگەن.
بۇعان دەيىن پاشينيان اسكەردەگى وقيعالار مەن قارۋلى كۇشتەردەگى جاعدايعا قاتىستى پىكىر ءبىلدىرىپ، وسى سالاعا تىكەلەي جاۋاپتى قۇرىلىمداردا كادرلىق وزگەرىستەر بولاتىنىن مالىمدەگەن ەدى. كوپ ۇزاماي قارۋلى كۇشتەردىڭ مورالدىق-پسيحولوگيالىق قامتاماسىز ەتۋ باسقارماسىنىڭ باستىعى سەرەجا ستەپانيان مەن اسكەري پوليتسيا باستىعى اشوت زاكاريان قىزمەتتەرىنەن بوساتىلدى.
