68 جاسىندا بەلگىلى قازاقستاندىق ءفوتوتىلشى يۋري بەككەر مەزگىلسىز دۇنيەدەن ءوتتى. قارالى حاباردى مادەنيەت جانە اقپارات مينيسترلىگى جەتكىزدى، دەپ حابارلايدى «ادىرنا» ءتىلشىسى.
«يۋري زەلمانوۆيچتىڭ تۋعان-تۋىستارى مەن جاقىندارىنا، ارىپتەستەرىنە، دوستارىنا جانە ونى بىلەتىن بارشا قاۋىمعا قايعىرىپ كوڭىل ايتادى. ول ۇزاق جىلدار بويى جۋرناليستيكا سالاسىندا ەڭبەك ەتىپ، قازاقستاننىڭ فوتوشەجىرەسىن جاساۋعا زور ۇلەس قوستى. بەككەردىڭ وبەكتيۆىنە ەلدىڭ قوعامدىق، ساياسي جانە مادەني ومىرىندەگى ماڭىزدى وقيعالار، بەلگىلى مەملەكەت قايراتكەرلەرى، ەڭبەك ادامدارى مەن قاراپايىم ازاماتتار ىلىكتى. فوتوسۋرەتتەرى قازاقستاننىڭ قازىرگى زامانعى تاريحىنىڭ ءبىر بولىگىنە اينالىپ، ءوز ءداۋىرىنىڭ تۇلعالارى مەن وقيعالارىن كەلەر ۇرپاققا جەتكىزدى»،– دەلىنگەن حابارلامادا.
يۋري زەلمانوۆيچتىڭ كاسىبي جولىنىڭ ەلەۋلى بولىگى «كازاحستانسكايا پراۆدا» گازەتىنىڭ رەداكتسياسىمەن بايلانىستى بولدى. ول ءومىرىنىڭ سوڭعى كۇندەرىنە دەيىن رەداكتسيادا ەڭبەك ەتءتى.
ايتا كەتەيىك، يۋري بەككەر 1987 جىلى جەلتوقساندا جەلتوقسان وقيعاسىنا قاتىسۋشىلار قايرات رىسقۇلبەكوۆ، تۇگەلباي تاشەنوۆ، جامبىل تايجۇماەۆ پەن ەرتاي كوپەسباەۆقا قاتىستى وتكەن سوت وتىرىسىنا ءفوتوتىلشى رەتىندە قاتىسقان. ول – سوت زالىنداعى تورتەۋدىڭ باسىن تىك كوتەرىپ وتىرعان ايگىلى سۋرەتتىڭ اۆتورى. ونىڭ وبەكتيۆىنە 2003 جىلعى قازاقستان كۋبوگىنىڭ فينالى دا تۇسكەن. سول كەزدەسۋدە زلاتكو كرمپوتيچ جاتتىقتىرعان «قايرات» «جەڭىستى» 3:1 ەسەبىمەن جەڭىپ، كلۋب تاريحىنداعى ءتورتىنشى كۋبوگىن يەلەنگەن. سونىمەن قاتار يۋري بەككەر الماتىلىق كلۋبتىڭ چەمپيوندار ليگاسىنداعى سوڭعى ماۋسىمدارعا دەيىنگى ويىندارىن، سونىڭ ىشىندە 2025 جىلى مادريدتىك «رەالعا» قارسى وتكەن كەزدەسۋىن دە تاسپاعا تۇسىرگەن.
