پاۆلودار وبلىسىندا 12 جاستاعى وقۋشى قىز زورلانعان سوڭ جۇكتى بولعانى تۋرالى اقپارات تارادى. ول دۇنيەگە قىز بالا اكەلدى، دەپ حابارلايدى “ادىرنا” ۇلتتىق پورتالى.
باستى كۇدىكتى رەتىندە ونىڭ تۋىسى قاماۋعا الىندى.
وقيعا شارباقتى اۋدانىندا بولعان. قىزدىڭ جۇكتىلىگى تۋرالى ءبىرىنشى بولىپ مۇعالىمدەر بىلگەن ەكەن. ولار وقۋشىنىڭ بويىنداعى وزگەرىستى بايقاپ، دەرەۋ اتا-اناسىنا حابارلاعاندارىن ايتادى.
ال ونىڭ تۋىسى كوللەدج ستۋدەنتى ءارى تۋىسى بولىپ شىقتى.
"جۇكتىلىك فاكتىسىن مەكتەپ اكىمشىلىگى وقۋشى كوكتەمگى كانيكۋلدان ورالعاننان كەيىن انىقتادى. سودان كەيىن اقپارات ءتيىستى ورگاندارعا بەرىلدى. بويجەتكەن مەن ونىڭ اناسى دەرەۋ اۋرۋحاناعا جەتكىزىلدى. ناۋقاس وبلىستىق پەريناتالدىق ورتالىققا 19 شىلدەدە ءتۇسىپ، 20-سى كۇنى بوسانعان. انا مەن بالانىڭ جاعدايى قاناعاتتانارلىق دەپ باعالانىپ وتىر. قازىرگى ۋاقىتتا شارباقتى اۋدانىنىڭ ىشكى ىستەر ورگاندارى تەرگەۋ امالدارىن جۇرگىزىپ جاتىر", – دەدى پاۆلودار وبلىسىنىڭ ءبىلىم باسقارماسىنان.
وقۋشى اتاۋلى الەۋمەتتىك كومەك الاتىن كوپبالالى جانە از قامتىلعان وتباسىنان شىققانى انىقتالعان. قىزدىڭ اكەسىن جەرگىلىكتى اكىمدىك گالكين اتىنداعى مەكتەپتە وت جاعۋشى بولىپ جۇمىسقا ورنالاستىرعان.
باق-تا مەكتەپ ديرەكتورىنىڭ جۇمىستان “قۋىلعانى” تۋرالى دەرەكتەر تاراۋدا. ال اۋداندىق ءبىلىم ءبولىمى بۇل اقپاراتتى راستامادى.
"فاكتى انىقتالعاننان كەيىن ديرەكتور جۇمىستا بولدى. ىشكى تەكسەرۋ بولدى. سودان كەيىن ول ۋاقىتقا ەڭبەككە جارامسىز دەمالىسىنا كەتتى. ەڭبەككە جارامسىزدىق پاراعى شىققان سوڭ ءوز ەركىمەن ارىز جازدى", – دەپ ءتۇسىندىردى اۋداندىق ءبىلىم ءبولىمىنىڭ باسشىسى مارالبەك يتەمگەنوۆ.
ايتا كەتەيىك، بۇل شارباقتى اۋدانىندا جاسوسپىرىمدەردىڭ جۇكتى بولۋىنىڭ ەكىنشى وقيعاسى بولىپ شىقتى.
