وليمپيادا تۇرلەرى بويىنشا سپورتتى دامىتۋ ديرەكتسياسىنىڭ باسشىسى مەن قىزمەتكەرى بيۋدجەت قاراجاتىن جىمقىرعاندارى ءۇشىن سوتتالدى، دەپ حابارلايدى "ادىرنا" ۇلتتىق پورتالى استانا قالاسىنىڭ پروكۋراتۋراسىنا سىلتەپ.
پروكۋراتۋرانىڭ مالىمەتىنشە، ديرەكتسيا باسشىسى 60 ميلليون تەڭگەدەن استام بيۋدجەت قاراجاتىن ۇرلاعان. ودان بولەك، قاراماعىنداعى قىزمەتكەردەن 4 ميلليون تەڭگە كولەمىندە پارا العان.
"سپورتشىلارعا ارنالعان سپورت زالدارىن تەگىن الۋ مۇمكىندىگى بولا تۇرا، ولاردى جالعا الۋ تۋرالى ەنشىلەس تۇلعالارمەن مەملەكەتتىك ساتىپ الۋ شارتتارى جاسالىپ، وقۋ-جاتتىعۋ جيىندارىنا بولىنگەن بيۋدجەت قاراجاتى جىمقىرىلعان.
سونىمەن قاتار، باسشىمەن بىرگە بيۋدجەت قاراجاتىن ۇرلاۋعا كومەكتەسكەنى ءۇشىن ديرەكتسيا قىزمەتكەرى دە سوتتالدى. مەملەكەتتىك ايىپتاۋشى سوتقا بارلىق دالەلدەمەلەردى ۇسىنا وتىرىپ، سوتتالۋشىلاردىڭ كىناسىزدىگى تۋرالى ۋاجدەرىن جوققا شىعاردى", - دەلىنگەن پروكۋراتۋرا تاراتقان حابارلامادا.
وليمپيادا تۇرلەرى بويىنشا سپورتتى دامىتۋ ديرەكتسياسىنىڭ باسشىسى 5 جىلعا، ونىڭ قاراماعىنداعىلار 4 جىلعا باس بوستاندىعىنان ايىرۋ جازاسىنا سوتتالدى.
