قاراعاندىدا 46 كەنشىنىڭ ءومىرىن قيعان كوستەنكو اتىنداعى شاحتاداعى جارىلىسقا قاتىستى سوت پروتسەسى اياقتالدى، دەپ حابارلايدى "ادىرنا".
قاراعاندىدا 2023 جىلدىڭ كۇزىندە كوستەنكو اتىنداعى شاحتادا ورىن العان قازاعا قاتىستى سوت پروتسەسى اياقتالدى. جارىلىس سالدارىنان 46 كەنشى جەر استىندا مەرت بولعان ەدى.
اليحان بوكەيحان اتىنداعى اۋداندىق سوتتىڭ سۋدياسى باحتيار احانوۆ كەنشىلەردىڭ ولىمىنە اكەلگەن اپاتقا بايلانىستى ۇكىمىن جاريالادى. ايىپتالۋشىلار قاتارىندا 10 ادام.
سوت ۇكىمىنە سايكەس كەلەسىدەي جازا كەسىلدى:
- سەرگەي مۋستيۆكو، كوستەنكو اتىنداعى شاحتا ديرەكتورى — 8 جىل باس بوستاندىعىنان ايىرىلدى;
- ۆاديم ەريومين، ءوندىرىس جونىندەگى ديرەكتوردىڭ ورىنباسارى — 7 جىل;
- نيكولاي گروزنوۆ، باس ينجەنەر — 7 جىل;
- ۆيكتور كوپتەنكوۆ، № 6 ۋچاسكە باستىعى — 7 جىل;
- ۆلاديمير گوننوچەنكو، قازبا جۇمىستارى جونىندەگى باس ينجەنەردىڭ ورىنباسارى — 6 جىل 6 اي;
- دميتري فەدورەنكو، ەڭبەكتى قورعاۋ جونىندەگى باس ينجەنەردىڭ ورىنباسارى — 6 جىل;
- ۆلاديمير شيشكانوۆ، جەلدەتۋ جانە ەڭبەكتى قورعاۋ ۋچاسكەسىنىڭ باستىعى — 5 جىل;
- دميتري كوتسار، باس مەحانيك — 6 جىل;
- ۆيتالي پەسترياتاك، شاڭ-جارىلىسقا قارسى قورعاۋ ۋچاسكە باستىعىنىڭ كومەكشىسى — 6 جىل;
- تولەگەن عابدۇشەۆ، كونۆەيەرلىك تاسىمالداۋ ۋچاسكەسىنىڭ باستىعى — 5 جىل.
ەسكە سالساق، كوستەنكو اتىنداعى شاحتاداعى جارىلىس 2023 جىلعى 28 قازاندا تاڭەرتەڭ بولدى. رەسمي مالىمەت بويىنشا، مەتان گازىنىڭ دەتوناتسياسى كومىر شاڭىنىڭ جارىلىس تىزبەگىن شاقىرعان، ونىڭ كونتسەنتراتسياسى رۇقسات ەتىلگەن نورمادان ەداۋىر جوعارى بولدى.
اپات كەزىندە جەر استىدا 252 ادام بولعان. 205 شاحتەر جەر بەتىنە شىعارىلدى. جەتى ادام دەنەسى بىردەن تابىلدى، بىراق ءبىر ساعات ىشىندە قۇربان سانى ونعا جەتتى. 31 قازاندا 46-شى شاحتەردىڭ دەنەسى تابىلدى.
قايعىلى وقيعا ورنىنا قاراعاندىعا پرەزيدەنت قاسىم-جومارت توقاەۆ كەلىپ، قازا بولعانداردىڭ وتباسىلارىنا كوڭىل ايتتى جانە «ارسەلورميتتال تەمىرتاۋ» كومپانياسىمەن ىنتىماقتاستىقتى توقتاتۋدى تاپسىردى.
وسىعان دەيىن الداعى سوت وتىرىسىندا پروكۋرورلار ايىپتالۋشىلارعا ەڭ قاتاڭ جازا سۇراعانى جايلى جازعان بولاتىنبىز.
