مەملەكەتتىك كەڭەسشى ەرلان قارين نارتاي ارالبايۇلىنىڭ Youtube كانالىنا بەرگەن سۇحباتىندا «ادىلەتتى قازاقستاندى» قۇرۋدى قامتاماسىز ەتۋدەگى وڭىرلەردەگى مەملەكەتتىك قىزمەتكەرلەردىڭ ەڭبەگىنە جوعارى باعا بەردى.
«ءبىز جۇرگىزىپ جاتقان مەملەكەتتىك ساياساتتىڭ نەگىزگى مىندەتى – ادىلەتتى قازاقستاندى قۇرۋ. ازاماتتارىمىزدى شەشىم قابىلداۋ پروتسەسىنە مەيلىنشە كەڭىنەن تارتۋ ماقساتىندا ساياسي رەفورمالار جاريالانىپ، جۇزەگە اسىپ جاتىر. اۋىل اكىمدەرى سايلانىپ جاتىر، اۋدان اكىمدەرى سايلانا باستادى، ءبىر مانداتتى سايلاۋ جۇيەسى ەنگىزىلدى. بۇل مۇمكىندىگىنشە ازاماتتارعا ساياساتقا قوعامدىق پروتسەستەرگە كەڭىنەن ارالاسۋعا مۇمكىندىك بەردى. ءبىر سوزبەن ايتقاندا بۇل رەفورمالار قاراپايىم ازاماتتاردىڭ ساياسي بەلسەندىلىگىن ارتتىردى. الايدا، مۇنىڭ ىڭعايسىز جاعى دا بار. بيلىككە جاپپاي تالاپ قويىپ شىعاتىن ازاماتتاردىڭ اراسىندا جەرگىلىكتى جەرلەردەگى مەملەكەتتىك قىزمەتكەرلەردىڭ جەكە باسىنا ءتيىپ، بۇيرىقتار بەرىپ، دورەكى سويلەيتىندەر دە جوق ەمەس» دەدى مەملەكەتتىك كەڭەسشى.
وكىنىشكە وراي، بۇگىنگى قوعامدا مەملەكەتتىك قىزمەتكەرلەرگە قاتىستى بىرجاقتى، ادىلەتسىز پىكىر قالىپتاسىپ قالعانىن، سونىڭ اسەرىمەن كوپ جاعدايدا ورىنسىز كىنالاۋلار ءجيى كورىنىس بەرەتىنىن اتاپ ءوتتى.
«كەشەگى سۋ تاسقىنى كەزىندە كۇن دەمەي، ءتۇن دەمەي ەل ازاماتتارىمەن بىرگە سۋ بوگەتتەرىن ورناتىپ، قۇم تاسىپ، كۇرەك ۇستاپ جۇرگەن اۋىل، اۋدان اكىمدىگى اپپاراتىنىڭ قاراپايىم قىزمەتكەرلەرى. ولاردىڭ دا وتباسىلارى بار، ۇيىندە كۇتىپ وتىرعان بالالارى بار. كۇندىز اكىمدىكتىڭ جۇمىسىمەن، كەشكە ەۆاكۋاتسيالىق پۋنكتە، بوگەت جۇمىستارىنىڭ باسى-قاسىندا ءجۇردى. جاعداي رەتتەلگەنشە ۇيلەرىنە اپتالاپ بارماي جۇرگەن قىزمەتكەرلەر بولدى. ءبىز قازىر سالا وكىلدەرىن قۇرمەتتەپ، ەڭبەكتەرىن دارىپتەپ جاتامىز. مەنىڭ ويىمشا، قاراپايىم مەملەكەتتىك قىزمەتكەرلەردىڭ دە جۇمىسى لايىقتى باعالانۋى كەرەك دەپ ويلايمىن» دەدى مەملەكەتتىك كەڭەسشى.
