جىلدىڭ ەڭ ماڭىزدى ءارى اۋقىمدى الەمدىك سپورتتىق شاراسى – 5-ءشى دۇنيەجۇزىلىك كوشپەندىلەر ويىندارىنىڭ باستالۋىنا 50 كۇن قالدى. كوشپەلىلەر مادەنيەتىنىڭ بىرەگەي مەرەكەسى سانالعان الەمدىك وقيعا ءداستۇر مەن زاماناۋي جەتىستىكتەردى ناسيحاتتاۋ ماقساتىندا الەمنىڭ تۇكپىر-تۇكپىرىنەن قاتىسۋشىلار مەن كورەرمەندەردىڭ باسىن بىرىكتىرەدى.
الەمدىك سپورت شاراسىنا 89 ەلدەن 2000-نان استام سپورتشى قاتىسادى دەپ كۇتىلۋدە. استانادا وتەتىن دۇنيەجۇزىلىك كوشپەندىلەر ويىندارىندا 21 سپورت تۇرىنەن 97 مەدال جيىنتىعى ساراپقا سالىنادى. 5-ءشى دۇنيەجۇزىلىك كوشپەندىلەر ويىندارىنىڭ باس دەمەۋشىسى – ALAGEUM ELECTRIC, باس سەرىكتەسى – حالىق بانكى.
قازىرگى تاڭدا ويىندارعا دايىندىق قىزۋ ءجۇرىپ جاتىر. بيلەتتەردى رەسمي بيلەت وپەراتورى zakazbiletov.kz سايتىنان الۋعا بولادى. بۇگىندە قازاق كۇرەسى، الىش (قىرعىز كۇرەسى), كوراش (تاتار كۇرەسى), ءداستۇرلى ساداق اتۋ، اسىق اتۋ، وردو، تاياق تارتۋ، كۇراش (وزبەك كۇرەسى), ارقان تارتىس، اشىرتمالى ابا گۇرەشى (تۇرىك كۇرەسى) جارىستارىنا بيلەتتەر ساتىلىمعا شىعارىلدى. اشىلۋ ءراسىمى مەن كوكپار، كوك ءبورى، بايگە، جامبى اتۋ، تەڭگە ءىلۋ، اۋدارىسپاق، قۇسبەگىلىك، الىپتار سايىسى سىندى جارىستارعا بيلەتتەر تامىز ايىنىڭ باسىندا ساتىلىمعا شىعادى. اسىرەسە ءداستۇرلى ساداق اتۋ مەن اسىق اتۋ جارىستارىنا سۇرانىس كوپ.
ويىننىڭ ماڭىزدى بولىگىنىڭ ءبىرى «بىرلىك كەرۋەنى» مادەني باعدارلاماسى. بۇل بىرەگەي جوبا كوشپەلى حالىقتاردىڭ مادەني بايلىعى مەن الۋان تۇرلىلىگىن كورسەتۋگە باعىتتالعان.
دۇنيەجۇزىلىك كوشپەندىلەر ويىندارىنا قاتىساتىن قازاقستاننىڭ ۇلتتىق قۇراماسى سوڭعى دايىندىق-جاتتىعۋ جيىندارىن وتكىزۋدە. بارشاڭىزدى وسى ايتۋلى مەرەكەگە قاتىسۋعا شاقىرامىز.
