Jyldyń eń mańyzdy ári aýqymdy álemdik sporttyq sharasy – 5-shi Dúnıejúzilik kóshpendiler oıyndarynyń bastalýyna 50 kún qaldy. Kóshpeliler mádenıetiniń biregeı merekesi sanalǵan álemdik oqıǵa dástúr men zamanaýı jetistikterdi nasıhattaý maqsatynda álemniń túkpir-túkpirinen qatysýshylar men kórermenderdiń basyn biriktiredi.
Álemdik sport sharasyna 89 elden 2000-nan astam sportshy qatysady dep kútilýde. Astanada ótetin Dúnıejúzilik kóshpendiler oıyndarynda 21 sport túrinen 97 medal jıyntyǵy sarapqa salynady. 5-shi Dúnıejúzilik kóshpendiler oıyndarynyń bas demeýshisi – ALAGEUM ELECTRIC, bas seriktesi – Halyq banki.
Qazirgi tańda Oıyndarǵa daıyndyq qyzý júrip jatyr. Bıletterdi resmı bılet operatory zakazbiletov.kz saıtynan alýǵa bolady. Búginde qazaq kúresi, Alysh (qyrǵyz kúresi), Kórásh (tatar kúresi), Dástúrli Sadaq Atý, Asyq Atý, Ordo, Taıaq tartý, Kúrásh (ózbek kúresi), Arqan tartys, Ashyrtmaly Aba Gúreshi (túrik kúresi) jarystaryna bıletter satylymǵa shyǵaryldy. Ashylý rásimi men Kókpar, Kók Bóri, Báıge, Jamby Atý, Teńge Ilý, Aýdaryspaq, Qusbegilik, Alyptar saıysy syndy jarystarǵa bıletter tamyz aıynyń basynda satylymǵa shyǵady. Ásirese dástúrli sadaq atý men asyq atý jarystaryna suranys kóp.
Oıynnyń mańyzdy bóliginiń biri «Birlik kerýeni» mádenı baǵdarlamasy. Bul biregeı joba kóshpeli halyqtardyń mádenı baılyǵy men alýan túrliligin kórsetýge baǵyttalǵan.
Dúnıejúzilik kóshpendiler oıyndaryna qatysatyn Qazaqstannyń ulttyq quramasy sońǵy daıyndyq-jattyǵý jıyndaryn ótkizýde. Barshańyzdy osy aıtýly merekege qatysýǵa shaqyramyz.
