قازاقتىڭ بەلگىلى دارىگەرى، پروفەسسور كۇلان وماروۆا دۇنيەدەن ءوتتى. قازاقستاننىڭ ونكوگەماتولوگيالىق قىزمەتىنىڭ نەگىزىن قالاۋشى 81 جاسىندا قايتىس بولدى، - دەپ حابارلايدى “ادىرنا” ۇلتتىق پورتالى.
قر دەنساۋلىق ساقتاۋ ءمينيسترى اقمارال ءالنازاروۆا دارىگەردىڭ قايتىس بولۋىنا بايلانىستى كوڭىل ايتتى.
«كۇلان ومارقىزى مەديتسينا قاۋىمىنىڭ، كوپتەگەن ستۋدەنتتەرىنىڭ، ارىپتەستەرىنىڭ جادىندا جارقىن، ەرەكشە تۇلعا، ءوز ءىسىنىڭ وراسان زور جاناشىرى رەتىندە قالدى. سونداي-اق، دەنساۋلىق ساقتاۋ مينيسترلىگىنىڭ اتىنان جۇزدەگەن، مىڭداعان بالالاردىڭ ءومىرىن ساقتاپ قالعان ۇلى دارىگەر رەتىندە قالادى جانە جەكە ءوزىم كۇلان ومارقىزىنىڭ بارلىق جاقىندارىنا، تۋىستارىنا شىن جۇرەكتەن كوڭىل ايتامىن، ونىڭ بالالار ونكوگەماتولوگياسى عىلىمىن دامىتۋعا قوسقان زور ۇلەسى، عىلىمي ەڭبەكتەرى، جاس ماماندارعا بەرگەن تاجىريبەسى مەن ءبىلىمى ۇزاق ۋاقىت بويى قىزمەت ەتەتىنىنە سەنىمدىمىز»، - دەپ جازدى مينيستر Facebook پاراقشاسىندا.
كۇلان وماروۆا 1944 جىلى الماتى وبلىسى، رايىمبەك اۋدانى، نارىنقول اۋىلىندا دۇنيەگە كەلدى. الماتى وبلىسى نارىنقول (قازىرگى رايىمبەك) اۋدانىندا دارىگەر، اۋدانى دارىگەر-پەدياتر (1967–1970), ماسكەۋ قالاسىنداعى كسرو مەديتسينا عىلىمدارى اكادەمياسىنىڭ پەدياتريا ينستيتۋتىندا اسپيرانت (1970–1973) قازاق كسر-ءى دەنساۋلىق ساقتاۋ مينيسترلىگىنىڭ پەدياتريا جانە بالالار حيرۋرگياسى ورتالىعىندا كىشى، اعا عىلىمي قىزمەتكەر، عىلىمي حاتشى (1973–1981), ينستيتۋت ديرەكتورىنىڭ عىلىمي جۇمىستار جونىندەگى ورىنباسارى (1981–1988) بولدى. رەسپۋبليكا بالالار ونكوگەماتولوگياسى ورتالىعىنىڭ ديرەكتورى (1989) قىزمەتتەرىن اتقارعان.
130-دان استام عىلىمي جاريالانىمنىڭ اۆتورى.
