Qazaqtyń belgili dárigeri, professor Kúlán Omarova dúnıeden ótti. Qazaqstannyń onkogematologııalyq qyzmetiniń negizin qalaýshy 81 jasynda qaıtys boldy, - dep habarlaıdy “Adyrna” ulttyq portaly.
QR Densaýlyq saqtaý mınıstri Aqmaral Álnazarova dárigerdiń qaıtys bolýyna baılanysty kóńil aıtty.
«Kúlán Omarqyzy medıına qaýymynyń, kóptegen stýdentteriniń, áriptesteriniń jadynda jarqyn, erekshe tulǵa, óz isiniń orasan zor janashyry retinde qaldy. Sondaı-aq, Densaýlyq saqtaý mınıstrliginiń atynan júzdegen, myńdaǵan balalardyń ómirin saqtap qalǵan uly dáriger retinde qalady jáne jeke ózim Kúlán Omarqyzynyń barlyq jaqyndaryna, týystaryna shyn júrekten kóńil aıtamyn, onyń balalar onkogematologııasy ǵylymyn damytýǵa qosqan zor úlesi, ǵylymı eńbekteri, jas mamandarǵa bergen tájirıbesi men bilimi uzaq ýaqyt boıy qyzmet etetinine senimdimiz», - dep jazdy mınıstr Facebook paraqshasynda.
Kúlán Omarova 1944 jyly Almaty oblysy, Raıymbek aýdany, Narynqol aýylynda dúnıege keldi. Almaty oblysy Narynqol (qazirgi Raıymbek) aýdanynda dáriger, aýdany dáriger-pedıatr (1967–1970), Máskeý qalasyndaǵy KSRO Medıına ǵylymdary akademııasynyń Pedıatrııa ınstıtýtynda aspırant (1970–1973) Qazaq KSR-i Densaýlyq saqtaý mınıstrliginiń Pedıatrııa jáne balalar hırýrgııasy ortalyǵynda kishi, aǵa ǵylymı qyzmetker, ǵylymı hatshy (1973–1981), ınstıtýt dırektorynyń ǵylymı jumystar jónindegi orynbasary (1981–1988) boldy. Respýblıka balalar onkogematologııasy ortalyǵynyń dırektory (1989) qyzmetterin atqarǵan.
130-dan astam ǵylymı jarııalanymnyń avtory.
