الماتى قالاسى پوليتسيا دەپارتامەنتى دارىگەرگە قاتىستى قىلمىستىق ءىس قوزعادى، دەپ حابارلايدى ەك.
الماتى قالاسى پوليتسيا دەپارتامەنتىنىڭ مالىمەتىنشە، 22 جاستاعى قىز اقىل ءتىسىن جۇلتىرتپاق بولعان. سەبەبى، بويجەتكەن جاقىندا تۇرمىسقا شىعۋدى جوسپارلاعان.
ءتىس دارىگەرى قىزعا ءتورت اقىل ءتىسىن بىردەن جۇلىپ تاستاۋ كەرەكتىگىن ايتقان. ءسويتىپ، بارلىعىن 420 مىڭ تەڭگەگە باعالاپتى. دارىگەر وعان وپەراتسيا تولىق ناركوزبەن جاسالاتىنىن تۇسىندىرگەن. التى ساعاتتان كەيىن قىز انافيلاكتيكالىق شوك الىپ، بىردەن كوز جۇمعان.
قازىر پوليتسيا دارىگەرگە قاتىستى قىلمىستىق ءىس قوزعادى.
"اتالعان دەرەك بويىنشا تەرگەۋ باستالدى. قىلمىستىق ءىس اۋەزوۆ اۋدانىندا تىركەلدى. تەرگەۋ بارىسى الماتى قالاسى پوليتسيا دەپارتامەنتىنىڭ باقىلاۋىنا الىندى", — دەدى الماتى قالاسى پد باستىعىنىڭ ورىنباسارى رۋستام ءابدىراحمانوۆ.
تۋعان-تۋىستارى قىزدى قالىڭدىق كويلەگىمەن جەرلەدى.
