«ماسس-مەديا» تۋرالى زاڭ جوباسى ماجىلىستەگى ءبىرىنشى وقىلىمدا ماقۇلداندى، دەپ حابارلايدى «ادىرنا» ءتىلشىسى.
قۇجاتتى مادەنيەت جانە اقپارات ءمينيسترى ايدا بالاەۆا تانىستىردى.
«مينيسترلىك زاڭ جوباسىن مەملەكەت مۇددەسىن، قوعام سۇرانىسىن جانە مەديا سالاسىنىڭ دامۋ تەندەنتسيالارىن ەسكەرە وتىرىپ ازىرلەدى.
ونى دايىنداۋ بارىسىندا ەۋروپا ەلدەرىنىڭ حالىقارالىق تاجىريبەسى، بىرىككەن ۇلتتار ۇيىمى مەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ستراتەگيالىق قۇجاتتارى جان-جاقتى زەردەلەندى»،—دەدى ول.
ايتۋىنشا، زاڭ جوباسىنىڭ نەگىزگى ماقساتى – ءسوز بوستاندىعىن، اقپاراتتىق قاۋىپسىزدىكتى قامتاماسىز ەتۋ، اسىرەسە جۋرناليستەردىڭ مارتەبەسىن ارتتىرۋ جانە مەملەكەتتىك ءتيىمدى اقپاراتتىق ساياساتتى قالىپتاستىرۋ.
سونداي-اق مينيستر جاڭا زاڭ جوباسىنا سايكەس باق-تىڭ رەسمي ساۋالىنا جاۋاپ بەرۋ مەرزىمى 7 كۇننەن 5 كۇنگە قىسقاراتىنىن اتاپ ءوتتى. بۇدان بولەك وتاندىق تەلەراديو حابار تاراتاتىن سپۋتنيكتىك وپەراتورلاردىڭ شىعىندارىنىڭ ءبىر بولىگى سۋبسيديالانادى. ال 2025 جىلدان باستاپ مەملەكەتتىك ەمەس باق رەسپۋبليكالىق دەڭگەيدە گرانتتىق قارجىلاندىرۋعا كوشەتىن بولادى.
ايتا كەتەيىك، ەكىنشى وقىلىمعا دەيىن جۇمىس توبى ءتيىستى مەملەكەتتىك ورگاندارمەن زاڭ جوباسىن تالقىلايدى.
