الماتى وبلىسى وتەگەن باتىر اۋىلىندا اناسى ءوز بالاسىن 16 جەردەن پىشاقتاعان، دەپ حابارلايدى “ادىرنا” ۇلتتىق پورتالى. وقيعا جايلى Angry_taldyk ينستاگرام پاراقشاسى جاريالادى.
"دارىگەرلەر بالانىڭ دەنەسىندە، ارقاسىنان، موينىنان، قولدارىنان بارلىعى 16 پىشاق جاراقاتىن انىقتادى. اناسى ءتىپتى ۇلىنىڭ تاماعىن پىشاقپەن تىلگىلەپ ۇلگەرگەن. بالا شۇعىل تۇردە وپەراتسيا بولىمىنە جەتكىزىلدى. زارداپ شەگۋشىنىڭ مۇشەلەرىن تەكسەرگەننەن كەيىن، حيرۋرگتاردان، انەستەزيولوگ-رەانيماتولوگتاردان قۇرالعان دارىگەرلەر وپەراتسياعا كىرىسكەن", - دەپ جازادى جازبا اۆتورى.
بۇدان بولەك، بالاعا تراۆماتيكالىق جانە گەمورراگيالىق شوك دياگنوزى قويىلدى.
"وپەراتسيانىڭ ءساتتى اياقتالعانىن، بالانىڭ جاعدايى اۋىر، بىراق تۇراقتى ەكەنىن بىلگەننەن كەيىن عانا مەن بولعان وقيعا جايىندا ءبولىسۋدى ءجون سانادىم", - دەپ جالعاستىرادى اۆتور.
كەيىن بەلگىلى بولعانداي، بالانىڭ اناسى سوڭعى ءۇش كۇننەن بەرى ءبىرتۇرلى مىنەز-قۇلىق تانىتقان.
"بالانىڭ اناسى كەيىنگى ءۇش كۇندە ءوزىن ءبىرتۇرلى ۇستاعانى بەلگىلى بولدى: ول ۇيدەگى بارلىق ادامنان جاسىرىنعان. ايەل ءوزىن Tik-Tok كەيىپكەرلەرى ولتىرگىسى كەلەتىنىن ايتقان. ال ۇلى وعان ويىنعا قاتىسۋشىلاردىڭ ءبىرى بولىپ كورىنگەن", - دەلىنگەن حابارلامادا.
الماتى وبلىسى پوليتسياسى كۇدىكتىنىڭ ۇستالعانىن جانە پوليتسيا بولىمىندە ەكەنىن مالىمدەدى.
"ساعات 15:00 شاماسىندا 10 جاسار بالا كوپتەگەن پىشاق جاراقاتىمەن وتەگەن باتىر اۋىلىنداعى بالالار اۋرۋحاناسىنا ءتۇستى. تەكسەرۋ بارىسىندا بالاعا اناسىنىڭ پىشاق سۇققانى انىقتالدى. كۇدىكتىگە قاتىستى سوت-پسيحياتريالىق ساراپتاما تاعايىندالدى، ونى پسيحولوگيالىق ديسپانسەرگە ورنالاستىرۋ ماسەلەسى شەشىلۋدە. اتالعان دەرەك بويىنشا قر قىلمىستىق كودەكسىنىڭ 106-بابى "دەنساۋلىققا قاساقانا اۋىر زيان كەلتىرۋ" بويىنشا سوتقا دەيىنگى تەرگەۋ امالدارى جۇرگىزىلۋدە. بىرقاتار ساراپتاما تاعايىندالدى. تەرگەۋ بارىسىندا ءىستىڭ بارلىق ءمان-جايى انىقتالادى", - دەپ حابارلادى الماتى وبلىستىق پد ءباسپاسوز قىزمەتى.
“ادىرنا” ۇلتتىق پورتالى
