ەلدىڭ تۇڭعىش پرەزيدەنتى نۇرسۇلتان نازارباەۆ جاساعان اقشا وپەراتسيالارى زاڭ نەگىزىندە باقىلانىپ وتىراتىن تۇلعالار تىزىمىندە بولۋى كەرەك. سەناتور مۇرات باقتيارۇلى جاڭا زاڭ جوباسىنا قاتىستى سۇراققا وسىلاي جاۋاپ بەردى، دەپ حابارلايدى “ادىرنا” ۇلتتىق پورتالى malim.kz سايتىنا سىلتەمە جاساپ.
كەشە سەنات “قىلمىستىق جولمەن جانە تەرروريزمدى قارجىلاندىرۋ ارقىلى كەلەتىن تابىستى زاڭداستىرۋمەن ء(ىزىن جاسىرۋ) قارسى كۇرەس سۇراقتارى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىن وزگەرتۋ مەن تولىقتىرۋلار ەنگىزۋ تۋرالى” زاڭ قابىلداپ، قۇجات قول قويۋ ءۇشىن پرەزيدەنتكە جىبەرىلدى.
سەناتتىڭ پلەنارلىق وتىرىسىندا ولگا پەرەپەچينا بۇل قۇجاتتىڭ زاڭسىز تابىستىڭ ءىزىن جاسىرۋ ارەكەتتەرىن ازايتۋ مەن وسى ارەكەتكە قارسى جۇيەنىڭ تيىمدىلىگىن ارتتىرۋعا باعىتتالعانىن ايتتى.
– قازاقستان رەسپۋبليكاسىنىڭ جاريا لاۋازىمدى ازاماتتارى جاساعان اقشا جانە وزگە دە مۇلىك وپەراتسيالارىن زاڭ نەگىزىندە باقىلاۋ ورناتۋ ءۇشىن كەزەڭ-كەزەڭىمەن “جاريا لاۋازىمدى تۇلعا” تۇسىنىگىن قالىپتاستىرىپ، جاريا لاۋازىمدى ازاماتتار ينستيتۋتىن قۇرۋ ۇسىنىلادى. بۇل ازاماتتار ءتىزىمىن پرەزيدەنت بەكىتىپ، قارجىلىق مونيتورينگ اگەنتتىگى جاريا لاۋازىمدى تۇلعالار مەن ولاردىڭ جولداستارى، جاقىن تۋىستارىنىڭ ءتىزىمىن جۇرگىزەدى. مونيتورينگتىڭ بۇل ءتۇرى جەمقورلىققا قارسى كۇرەس ءۇشىن دە پايدالى بولماق”، - دەدى پەرەپەچينا پالاتا وتىرىسىندا.
Exclusive.kz ءجۋرناليستىنىڭ جاريا لاۋازىمدى تۇلعالار ءتىزىمى قالاي جاسالىپ، تىزىمگە كىمدەر كىرەتىنىنە قاتىستى سۇراعىنا سەنات دەپۋتاتى مۇرات باقتيارۇلى جاريا لاۋازىمدى ازاماتتاردىڭ ءبارى تىزىمدە بولادى دەپ جاۋاپ بەردى. ونىڭ سوزىنشە، بۇل تىزىمدە دەپۋتاتتار، ۇكىمەت مۇشەلەرى مەن اكىمدەر مەن قاتار ەلباسى دا مىندەتتى تۇردە بولۋى كەرەك ەكەن.
ءجۋرناليستىڭ “بۇل ءتىزىمدى نەلىكتەن دەپۋتاتتار ەمەس، پرەزيدەنت بەكىتۋى كەرەك؟” دەگەن سۇراعىنا باقتيارۇلى زاڭ جوباسىن جاساۋشى - ءماجىلىس دەپۋتاتتارىنا جۇگىنۋدى ۇسىندى.
ەگەر پرەزيدەنت قاسىم-جومارت توقاەۆ جاڭا زاڭ جوباسىنا ەش وزگەرىسسىز قول قوياتىن بولسا، جاريا لاۋازىمدى تۇلعالار تىزىمىنە ەكس-پرەزيدەنتتىڭ كىرىپ-كىرمەۋىن دە ءوزى شەشۋى كەرەك بولادى.
“ادىرنا” ۇلتتىق پورتالى
