Abaı oblysynda qyrýar qarjyǵa salynǵan kóshe dárethanasy jumys istemeı jabyq tur, dep habarlaıdy "Adyrna" ulttyq portaly Halyq únine silteme jasap.
Bul týraly «Ádildik joly» respýblıkalyq qoǵamdyq birlestigi tóraǵasy Dıdar Smaǵulov jelidegi paraqshasynda bólisti.
Onyń sózinshe, quny 31 562 600 teńgelik dárethana Semeı qalasynan Qaraýylǵa barar jolda jumys istemeı tur. Tapsyrys berýshiler bul nysandy aqpanda qabyldap, aqysyn tólep qoıypty.
Jergilikti sheneýnikter sanıtarlyq-gıgıenalyq torapty «Semeı joldary» JShS oryndaıtyn avtomobıl joldaryn kútip ustaý jumystarynyń ishine kirgizip jibergen. Alaıda kútip ustaý shyǵyndary 1,5 jyl ishinde 2 mıllıard teńgeden asyp ketkenin aıtyp, tóraǵa Dıdar Smaǵulov dabyl qaqty.
Ishki memlekettik aýdıt departamenti dárethanany 2024 jyldyń 16 aqpanyndaǵy №17 akti arqyly Abaı oblysy jolaýshylar kóligi jáne avtomobıl joldary basqarmasynyń burynǵy basshysy Asylbek Nuǵmanov qabyldap alǵan. Esigi jabyq turǵan dárethanany eki kúzetshi kúzetetini belgili boldy.
Jolaýshynyń qajetine jaraý úin salynǵan nysanda jaryq ta, sý da qosylmaǵan. Mıllıondaǵan qarajatqa salynǵan dárethananyń tóbesi otyrylyp, qulap jatqan kórinedi.
"Soǵan qaraǵanda qymbat dárethanaǵa arzan qurylys materıaldary qoldanylyp, jumystyń ózi qalaı bolsa, solaı istelgendeı áser qaldyrady. 1 500 shaqyrym jol júrip kelgende «laksherı» dárethanadan mundaıdy kútpegen edim", - dep jazdy Dıdar Smaǵulov.
Aıta keteıik, Aqtaýda 87 mıllıon teńgege salynǵan dárethanalar isten shyqqan bolatyn.
