بۇگىن قر مادەنيەت جانە اقپارات ءمينيسترى ايدا بالاەۆا Euronews ديرەكتورلار كەڭەسىنىڭ توراعاسى پەدرو ۆارگاس داۆيدپەن كەزدەستى. كەزدەسۋ بارىسىندا تاراپتار قازاقستاننىڭ Euronews-پەن ىنتىماقتاستىعى تۋرالى مەموراندۋمعا قول قويدى.
«Euronews وڭىرلىك وكىلدىگىنىڭ اشىلۋى – ارنانىڭ حالىقارالىق اۋديتورياعا قازاقستاننىڭ ەكونوميكالىق، ساياسي، الەۋمەتتىك جانە مادەني دامۋىن جان-جاقتى ناسيحاتتاۋىنا ۇلكەن مۇمكىندىك بەرەدى»، - دەپ اتاپ ءوتتى مينيستر.
Euronews وڭىرلىك وكىلدىگىنىڭ اشىلۋى قازاقستاندىق جۋرناليستەرگە كوپ مۇمكىندىك سىيلايدى. كەزدەسۋ بارىسىندا وتاندىق تەلەارنا قىزمەتكەرلەرىنىڭ بىلىكتىلىگىن ارتتىرۋعا ارنالعان وقىتۋ ترەنينگتەرى مەن شەبەرلىك سىنىپتارىن وتكىزۋ ماسەلەسى تالقىلاندى. بۇل قازاقستاندىق باق وكىلدەرىنىڭ كاسىبي بىلىكتىلىگىن ارتتىرۋعا سەپتىگىن تيگىزەدى.
«تالقىلاۋ ءارى مەموراندۋمعا قول قويۋ قىسقا ۋاقىتتا جاسالدى، بۇل ەكى تاراپتىڭ دا جەمىستى ىنتىماقتاستىققا مۇددەلى ەكەندىگىن جانە ونىڭ ماڭىزىن ايقىندايدى. ءبىز ءۇشىن قازاقستاندىق جۋرناليستەردى جان-جاقتى قولداۋ ماڭىزدى. ءبىز ورتاق جۇمىس ءۇشىن ەۋروپالىق جۋرناليستەردى قازاقستانعا اكەلىپ قانا قويماي، قازاقستاندىق باق اراسىندا جاڭا تۇلعالاردى، تالانتتى جاستاردى ىزدەيتىن بولامىز»، – دەدى پەدرو ۆارگاس داۆيد.
مادەنيەت جانە اقپارات ءمينيسترى قازاقستاندا كاسىبي ءارى مىقتى رەداكتسيا قۇرۋ ءۇشىن بارلىق مۇمكىندىكتەر بار ەكەنىن ءسوز ەتتى.
«بۇگىن تاريحي كۇن. قازاقستاندا Euronews كەڭسەسىنىڭ اشىلۋى ەل ءۇشىن ماڭىزدى كەزەڭدەردىڭ ءبىرى. قازاقستاننىڭ حالىقارالىق ارەناداعى مەديا كەڭىستىكتە ءوز ورىنىن تابۋعا كومەكتەسەتىن ماڭىزدى جوبانىڭ ءبىر بولىگى بولۋ – ءبىز ءۇشىن ۇلكەن مارتەبە»، - دەپ اتاپ ءوتتى قازاقستانداعى Euronews جوباسىنىڭ رەسمي وكىلى اسەل قوجاقوۆا.
بۇدان ءارى تاراپتار مەديانى دامىتۋعا جانە حالىقارالىق اقپارات الماسۋدى نىعايتۋعا باعىتتالعان بىرلەسكەن جوبالار مەن باستامالاردى جۇزەگە اسىرىپ، ءوزارا ىنتىماقتاستىق ورناتۋعا مۇددەلى ەكەنىن جەتكىزدى.
قر مادەنيەت جانە اقپارات مينيسترلىگىنىڭ ءباسپاسوز قىزمەتى
