Búgin QR Mádenıet jáne aqparat mınıstri Aıda Balaeva Euronews dırektorlar keńesiniń tóraǵasy Pedro Vargas Davıdpen kezdesti. Kezdesý barysynda taraptar Qazaqstannyń Euronews-pen yntymaqtastyǵy týraly memorandýmǵa qol qoıdy.
«Euronews óńirlik ókildiginiń ashylýy – arnanyń halyqaralyq aýdıtorııaǵa Qazaqstannyń ekonomıkalyq, saıası, áleýmettik jáne mádenı damýyn jan-jaqty nasıhattaýyna úlken múmkindik beredi», - dep atap ótti mınıstr.
Euronews óńirlik ókildiginiń ashylýy qazaqstandyq jýrnalısterge kóp múmkindik syılaıdy. Kezdesý barysynda otandyq telearna qyzmetkerleriniń biliktiligin arttyrýǵa arnalǵan oqytý trenıngteri men sheberlik synyptaryn ótkizý máselesi talqylandy. Bul qazaqstandyq BAQ ókilderiniń kásibı biliktiligin arttyrýǵa septigin tıgizedi.
«Talqylaý ári memorandýmǵa qol qoıý qysqa ýaqytta jasaldy, bul eki taraptyń da jemisti yntymaqtastyqqa múddeli ekendigin jáne onyń mańyzyn aıqyndaıdy. Biz úshin qazaqstandyq jýrnalısterdi jan-jaqty qoldaý mańyzdy. Biz ortaq jumys úshin eýropalyq jýrnalısterdi Qazaqstanǵa ákelip qana qoımaı, qazaqstandyq BAQ arasynda jańa tulǵalardy, talantty jastardy izdeıtin bolamyz», – dedi Pedro Vargas Davıd.
Mádenıet jáne aqparat mınıstri Qazaqstanda kásibı ári myqty redakııa qurý úshin barlyq múmkindikter bar ekenin sóz etti.
«Búgin tarıhı kún. Qazaqstanda Euronews keńsesiniń ashylýy el úshin mańyzdy kezeńderdiń biri. Qazaqstannyń halyqaralyq arenadaǵy medıa keńistikte óz orynyn tabýǵa kómektesetin mańyzdy jobanyń bir bóligi bolý – biz úshin úlken mártebe», - dep atap ótti Qazaqstandaǵy Euronews jobasynyń resmı ókili Ásel Qojaqova.
Budan ári taraptar medıany damytýǵa jáne halyqaralyq aqparat almasýdy nyǵaıtýǵa baǵyttalǵan birlesken jobalar men bastamalardy júzege asyryp, ózara yntymaqtastyq ornatýǵa múddeli ekenin jetkizdi.
QR Mádenıet jáne aqparat mınıstrliginiń baspasóz qyzmeti
