جەتىسۋ وبلىسى، كەربۇلاق اۋداندىق ءماسليحاتتىڭ توراعاسى 300 مىڭ تەڭگەگە كرەسلو ساتىپ الماق، دەپ حابارلايدى ادىرنا ۇلتتىق پورتالى satypalu.gov.kz سايتىنا سىلتەمە جاساپ.
5 شىلدە كۇنى "كەربۇلاق اۋداندىق ءماسليحاتىنىڭ اپپاراتى" مەملەكەتتىك مەكەمەسى satypalu.gov.kz سايتى ارقىلى "باسشىعا ارنالعان اعاش جاقتاۋدان، تازا بىلعارىدان قاپتاپ جاسالعان، رەتتەلەتىن كەڭسەلىك كرەسلو ساتىپ الۋ" دەگەن تاقىرىپپەن تەندەر جاريالاعان. اۋداندىق ءماسليحات ءبىر عانا باستىق كرەسلوسىنىڭ قۇنىن 300 مىڭ تەڭگەگە باعالاعان. مەملەكەتتىك ساتىپ الۋ جەڭىمپازى 15 شىلدە كۇنى انىقتالادى.
جەڭىمپاز كومپانيا قىمبات كرەسلونى كەلىسىم شارتقا قول قويىلعان كۇننەن كەيىن 15 كۇن ىشىندە كەربۇلاق اۋدانى، سارىوزەك اۋىلى، ب.مومىشۇلى كوشەسى، 10 ۇيگە جەتكىزۋى ءتيىس.
كەڭسە كرەسلوسىنىڭ بيىكتىگى 130 سم-دەن، ەنى 60 سم-دەن، تەرەڭدىگى 60 سم-دەن، ماكسيمالدى جۇكتەمە سالماعى 250.0 كەلىدەن كەم بولماۋى كەرەك. ارينە، ءماسليحات توراعاسىنىڭ سالماعىنىڭ قانشا تارتاتىنىن بىلمەيمىز، دەسە دە وزدىگىنەن "ماسليحاتقا 250.0 كەلىنى كوتەرەتىن تاباندارىندا جىلجىمالى دوڭگەلەكتەرى بار باستىق ورىندىعى نە ءۇشىن قاجەت؟" دەگەن ساۋال وزدىگىنەن تۋادى.
مەملەكەتتىك ساتىپ الۋ سايتىنداعى باسشى كرەسلولارىنىڭ باعالارىن دا قاراپ شىقتىق. ولاردىڭ جالپىلاما قۇنى 100-150 مىڭ تەڭگەدەن اسپايدى ەكەن. جالپى، باسشىنىڭ جايلى ورىندىعىن ەكى ەسە باعاسىنا ساتىپ الۋ قانشالىقتى ورىندى ءىس؟
بۇل سۇراقتى ءتيىستى مەكەمەگە جولدادىق. ولاردان جەتكەن جاۋاپتى دا قوسىمشا جاريالايتىن بولامىز!
اقان بىرلىك
ادىرنا ۇلتتىق پورتالى
