Jetisý oblysy, Kerbulaq aýdandyq máslıhattyń tóraǵasy 300 myń teńgege kreslo satyp almaq, dep habarlaıdy Adyrna ulttyq portaly satypalu.gov.kz saıtyna silteme jasap.
5 shilde kúni "Kerbulaq aýdandyq máslıhatynyń apparaty" memlekettik mekemesi satypalu.gov.kz saıty arqyly "Basshyǵa arnalǵan aǵash jaqtaýdan, taza bylǵarydan qaptap jasalǵan, retteletin keńselik kreslo satyp alý" degen taqyryppen tender jarııalaǵan. Aýdandyq máslıhat bir ǵana bastyq kreslosynyń qunyn 300 myń teńgege baǵalaǵan. Memlekettik satyp alý jeńimpazy 15 shilde kúni anyqtalady.
Jeńimpaz kompanııa qymbat kreslony kelisim shartqa qol qoıylǵan kúnnen keıin 15 kún ishinde Kerbulaq aýdany, Saryózek aýyly, B.Momyshuly kóshesi, 10 úıge jetkizýi tıis.
Keńse kreslosynyń bıiktigi 130 sm-den, eni 60 sm-den, tereńdigi 60 sm-den, maksımaldy júkteme salmaǵy 250.0 keliden kem bolmaýy kerek. Árıne, máslıhat tóraǵasynyń salmaǵynyń qansha tartatynyn bilmeımiz, dese de ózdiginen "máslıhatqa 250.0 kelini kóteretin tabandarynda jyljymaly dóńgelekteri bar bastyq oryndyǵy ne úshin qajet?" degen saýal ózdiginen týady.
Memlekettik satyp alý saıtyndaǵy basshy kreslolarynyń baǵalaryn da qarap shyqtyq. Olardyń jalpylama quny 100-150 myń teńgeden aspaıdy eken. Jalpy, basshynyń jaıly oryndyǵyn eki ese baǵasyna satyp alý qanshalyqty oryndy is?
Bul suraqty tıisti mekemege joldadyq. Olardan jetken jaýapty da qosymsha jarııalaıtyn bolamyz!
Aqan Birlik
Adyrna ulttyq portaly
