قىزىلجار اۋىلى تۇرعىندارىنىڭ كوڭىلى كۇپتى. ولاردىڭ مال ازىعىنا دەپ ارنايى جيعان-تەرگەندەرىنىڭ بارلىعى سۋمەن بىرگە اعىپ كەتكەن.
"ماتەريالدىق شىعىن كوپ. ەنى توننا كومىرىمىز اعىپ كەتتى، مالعا بەرەتىن جەمىم اعىپ كەتتى. مالدىڭ ءشوبى دە كەتتى. اكىمدىكتەن كومەك بولعان جوق. كەشە تۇنىمەن ۇيىقتاعان جوقپىز. ءۇيدىڭ استىنا دەيىن سۋ كىردى. ىلعال", - دەدى قىزىلجار اۋىلىنىڭ تۇرعىنى مۇرات بايدولدا.
كتك تەلەارناسىنىڭ حابارلاۋىنشا, قىزىلجار اۋىلىندا مۇنداي جاعداي العاش رەت بولىپ تۇرعان جوق. وسىدان 13 جىل بۇرىن تاسقىن بولعان.
"سول كەزدەن باستاپ بۇنىڭ ءبارىن قولعا الۋ كەرەك ەدى. وسى ۋاقىتقا دەيىن قاقساپ، ايتىپ كەلە جاتىرمىز. كوپىردى جاساپ قويادى. ول كوپىرگە سۋ سىيمايدى. اسادى دا كەتەدى. ايتتىق، ەشكىم قاراعان جوق. تومەنگى اۋىلدى سۋ باسىپ جاتىر. ۇيدە قارت اكە-شەشەمىز وتىر", - دەپ شاعىم ايتتى قىزىلجار اۋىلىنىڭ تۇرعىنى ءاليا ۇسەنبەكوۆا.
اكىمدىكتىڭ راسىندا اۋىلدى سۋ العانىنان حابارى بولماعان. ونى وزدەرى اشىق مويىنداپ وتىر. الايدا، ولار ەل حابارلاعاندانداي، 20 شاڭىراقتى ەمەس، 8 ءۇيدى سۋ باسقان دەدى.
"قىزىل سۋدىڭ اعىپ جاتقان اعىمى ءۇش تەكشە مەتر بولسا، قازىر بىرەۋگە ءتۇستى. كەشەلى بەرى وسىندا ءجۇرمىز. كەشە ءتورت ءۇي بولعان. ءبىر ءۇيدىڭ كومىرىن، ءبىر ءۇيدىڭ 500 كەلى كاربىن اعىزىپ كەتكەن. ەگەر كەرەك بولسا، ورنىنا الىپ بەرەمىز", - دەدى كەربۇلاق اۋدانىنىڭ اكىمى قانات ەسبولاتوۆ.
"Kazinform"-نىڭ حابارلاۋىنشا, كەربۇلاق اۋدانىنىڭ جەرگىلىكتى اتقارۋشى ورگاندارى مەن وبلىستىق تجد سۋدى بۇرۋ ءۇشىن قىزىلجار اۋىلىنىڭ جوعارى جاعىنان ۇزىندىعى 1 كم، ەنى 1,5 مەتر، تەرەڭدىگى 2 مەتر كانال قازدى. ۇيلەردىڭ اۋلالارىن سۋ باسۋ قاۋپى بارىنشا ازايتىلدى. جۇمىستار تولىعىمەن اياقتالدى، ەرىگەن قار سۋى بايعازى وزەنىنە قۇيىلىپ جاتىر.
"ادىرنا" ۇلتتىق پورتالى
