كانادادا وسكەن قازاق جىگىتى جاندوس رايان اراعا بىرنەشە جىل سالىپ بيولوگيالىق اناسىمەن كەزدەستى، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
شەتەلدىكتەر باۋىرىنا باسقان قازاق بالاسى جاندوس 10 ايلىعىندا شەكارا اسىپ كەتكەن. ونى تورونتودا تۇراتىن شەتەلدىك وتباسى اسىرىپ العان. كانادالىقتار ەر جەتكەن ۇلدارىنىڭ قالاۋىنا قارسى شىقپاي، قازاقستانعا الىپ كەلگەن. ول 17 جىلدان كەيىن عانا ءوز تۋعان جەرىنە اياعىن باستى.
"انام مەنى تاستاپ كەتسە دە وعان ەش وكپەم جوق ەكەنىن ايتقىم كەلەدى. ونى جازعىرمايمىن دا. تاعدىردىڭ جازۋى سولاي شىعار. ال اتا جۇرتىم مەنى ەرەكشە ىستىق ىقىلاسىمەن قارسى الدى. جايلاۋدا بولىپ، دومبىرا اسپابىمەن تانىستىم. حالقىم قوناقجاي ەكەن", - دەدى جاندوس.
تۋعانىن كورگەن قازاق جىگىتى باۋىرلارىمەن دە تانىستى. كەيىننەن سابيلەر ۇيىنە بارىپ، ءوزىن باققان تاربيەشىلەرمەن قاۋىشتى.
"ول تۋعان اناسىن كورگىسى كەلە مە جوق پا ءوزى شەشەدى دەپ كەلدىك. ۇلىمىزدىڭ تورونتودا قازاق دوستارى كوپ. ولارمەن ءجيى كەزدەسىپ، ارالاسىپ تۇرادى. سوندا دوستارىنىڭ ءبىرى اناسىن تابۋعا كەڭەس بەرگەن. ءبىز ونىڭ نيەتىن قولداپ، اقتاۋعا الىپ كەلدىك", - دەدى اسىراپ العان اناسى شەتەلدىك ايەل شاناس مۇحامەد.
