Kanadada ósken qazaq jigiti Jandos Raıan araǵa birneshe jyl salyp bıologııalyq anasymen kezdesti, dep habarlaıdy "Adyrna" ulttyq portaly Informbıýroǵa siltep.
Sheteldikter baýyryna basqan qazaq balasy Jandos 10 aılyǵynda shekara asyp ketken. Ony Torontoda turatyn sheteldik otbasy asyryp alǵan. Kanadalyqtar er jetken uldarynyń qalaýyna qarsy shyqpaı, Qazaqstanǵa alyp kelgen. Ol 17 jyldan keıin ǵana óz týǵan jerine aıaǵyn basty.
"Anam meni tastap ketse de oǵan esh ókpem joq ekenin aıtqym keledi. Ony jazǵyrmaımyn da. Taǵdyrdyń jazýy solaı shyǵar. Al Ata jurtym meni erekshe ystyq yqylasymen qarsy aldy. Jaılaýda bolyp, dombyra aspabymen tanystym. Halqym qonaqjaı eken", - dedi Jandos.
Týǵanyn kórgen qazaq jigiti baýyrlarymen de tanysty. Keıinnen sábıler úıine baryp, ózin baqqan tárbıeshilermen qaýyshty.
"Ol týǵan anasyn kórgisi kele me joq pa ózi sheshedi dep keldik. Ulymyzdyń Torontoda qazaq dostary kóp. Olarmen jıi kezdesip, aralasyp turady. Sonda dostarynyń biri anasyn tabýǵa keńes bergen. Biz onyń nıetin qoldap, Aqtaýǵa alyp keldik", - dedi asyrap alǵan anasy sheteldik áıel Shanas Muhamed.
