ەركىن كۇرەستەن قازاقستان ۇلتتىق قۇراماسى ءوز ەلىندە وتەتىن الەم چەمپيوناتىنا دايىندىق اياسىندا پولشا استاناسى ۆارشاۆاعا اتتاندى.
تانىمال بالۋان قازاق سپورتشىلارى ىشىنەن كىمنىڭ توسىنسىي جاساۋى مۇمكىن ەكەنىن ايتتى.
ەركىن كۇرەستەن قازاقستان ۇلتتىق قۇراماسى ۆارشاۆاداعى "ۆاتسلاۆ تسيولكوۆسكي مەموريالى-2019" تۋرنيرىنە قاتىسادى.
وسىعان دەيىن باپكەرلەر شتابى ءدال وسى جارىستان كەيىن تولىق قۇرام انىقتالادى دەپ ايتقان بولاتىن.
رەسەي قۇراماسى ساپىندا اسا اۋىر سالماقتا بەلدەسكەن تانىمال ەركىن كۇرەس شەبەرى ەدۋارد بازروۆ، الەم چەمپيوناتىندا قاي قازاق اتوي سالۋى مۇمكىن ەكەنىن توپشىلادى. ول ءار جىلدارى رەسەي چەمپيونى اتانىپ، ءىرى xالىقارالىق تۋرنيلەردىڭ جەڭىمپازى مەن جۇلدەگەرلەر قاتارىنان كورىنىپ، بوز كىلەمدە بيليال ماxوۆتىڭ باستى قارسىلاسى بولدى. قازىر ەدۋارد قازاقستان فەدەراتسياسىنىڭ شاقىرۋىمەن گرەك-ريم، ەركىن جانە ايەلدەر كۇرەسى اكادەمياسىندا جاستار جانە جاسوسپىرىمدەردىڭ فيزيكالىق دايىندىعىنا جاۋاپ بەرەدى.
- ءبىز ۇنەمى اكادەميادا ءومىر سۇرگەننەن كەيىن، جيىن كەزىندە قۇرامامەن بىرگە جاتتىعامىز. جىگىتتەر كوز المدىمىزدا ءجۇر. كىمنىڭ قانشالىقتى دەڭگەيدە دايىن ەكەنىن كورە الامىز. پولشاداعى تۋرنير الەم چەمپيوناتىنا دەگەن دايىندىقتىڭ شەشۋشى كەزەڭى دەپ ايتۋعا بولادى. مىقتىلارمەن كۇرەسىپ قالۋدىڭ سوڭعى مۇمكىندىگى بولىپ تۇر. الەم بىرىنشىلىگىنە دەيىن از عانا ۋاقىت قالدى. جالپى، باپكەرلەر شتابى دا ۇلكەن دوداعا قاتىساتىن كوماندانىڭ جوسپارى دا بار شىعار. كەيبىر سالماق دارەجەلەرىندە اتوي سالماساق تا، كەيبىرىندە مەدال ءۇشىن كۇرەسە الامىز. مىسالى، ازيا چەمپيونى، بىلتىرعى الەم چەمپيوناتىنىڭ ءفيناليستى - نۇريسلام ساناەۆ. دانيار قايسانوۆ (74 كەلى) تاماشا ماۋسىم وتكىزدى. ازيا چەمپيونى اتانىپ، ساسساريدەگى تۋرنير فينالىندا اتاعىنان ات ۇركەتىن فرانك چاميزوعا ءسال ەسە جىبەرىپ الدى. 65, 86, 92 جانە 125 كەلىدە ناقتى شەشىم قابىلدانبادى. وسى سالماقتاعى بالۋانداردى پولشاداعى تۋرنيردەن كەيىن بىلەمىز. جارىستا كىمنىڭ باعى جانادى، سول قۇرامانىڭ نامىسىن قورعاماق.
- ەدۋارد، كەزىندە ءسىز اسا اۋىر سالماق دارەجەسى 125 كەلىگە دەيىن بەلدەستىڭىز. وسى سالماقتا ولەگ بولتين جانە يۋسۋپ باتىرمۋرزاەۆ سەكىلدى ەكى ۇمىتكەرىمىز بار. ءسىزدىڭ ويىڭىزشا، كىمنىڭ مۇمكىندىگى كوبىرەك؟
- باتىرمۋرزاەۆ ءۇشىن بيىلعى ماۋسىم ءساتتى بولدى دەپ ايتۋعا بولادى. 23 جاسقا دەيىنگىلەردىڭ اراسىندا ازيا چەمپيونى اتاندى. ول جەردە ەرەسەكتەرشە كۇرەس كورسەتتى. ولەگ بولتين اۋىر سالماقتاعى قازاقستاننىڭ بەتكە ۇستار بالۋاندارىنىڭ ءبىرى. ەكەۋى دە تارتىپكە باعىناتىن، تاماشا سپورتشىلار. ەكەۋىنىڭ دە پولشاعا اتتانعانى وتە دۇرىس شەشىم. تۋرنير قورىتىندىسى بويىنشا ۇزدىگى انىقتالادى. ەڭ مىقتىسى جەڭىسكە جەتسىن.
- ءار الەم چەمپيوناتى جاڭا ەسىمدەردىڭ تۋىنا مۇمكىندىك بەرەدى. قازاقستاندىق قاي بالۋان بارشانىڭ نازارىن وزىنە اۋدارىپ، تاڭعالدىرا الادى دەپ ويلايسىز؟
- ءبىز كوشباسشىلار تۋرالى ايتتىق. ەندى توسىننان جارق ەتۋى مۇمكىن سپورتشىلارعا كەلسەك، 70 كەلىدە نۇرقوجا قايپانوۆتىڭ ايى وڭىنان تۋى مۇمكىن. بالۋان ەندى عانا 20-دان استى. وسى جىلى ول قازاقستان چەمپيوناتىن جەڭىپ الىپ، ەل تاريxىندا ەڭ جاس ازيا چەمپيونى رەتىندە قالدى. ونىڭ كۇرەس ستيلىندە قازاق كۇرەس مەكتەبى انىق كورىنەدى. ءار مەكتەپتىڭ ءوز كوشباسشىسى بار، مىسالى، امەريكالىق كۇرەستە - كايل سنايدەر، رەسەيلىكتە - سادۋللاەۆ، يراندىقتا - يازداني چەراتي. قايپانوۆ تا ايدى اسپاننان ءبىر-اق شىعارىپ، بولاشاقتا قازاق كۇرەس مەكتەبىنىڭ العادايى اتانۋى عاجاپ ەمەس. قازىر ول جانە باسقا سپورتشىلار دا مىقتى باپكەرلەر شتابىمەن، ءىرى جارىستارعا دۇرىس دايىندىقپەن بارۋعا تاكتيكا قۇرا الاتىن مايربەك يۋسۋپوۆپەن جۇمىس ىستەۋ مۇمكىندىگى بار.
ەستەرىڭىزگە سالا كەتەيىك، نۇر-سۇلتان قالاسىنداعى گرەك-ريم، ەركىن جانە ايەلدەر كۇرەسىنەن الەم چەمپيوناتى قىركۇيەكتىڭ 14-22 ارالىعىندا وتەدى.
"ادىرنا" ۇلتتىق پورتالى
