سال-سەرى
ۋاليبەك: قارسى الىڭىزدار! الدارىڭىزدا كونەنىڭ كوزى، بۇگىنگىنىڭ ءوزى،..
سال-سەرى: ەي، توقتا! سەن نە مەنى ەل تانىمايدى دەپ تۇرساڭ با؟!
ۋاليبەك: ويباي، كوكە-اۋ، ءوزىڭىز ەمەس پە ەدىڭىز، كۇنى كەشە عانا اتاق-ابىرويىمنىڭ ءبارىن ايت دەپ ساباعان.
سال-سەرى: ول كەزدە مەنى ەشكىم تانىمايتىن. ال، قازىر ءبارى بىلەدى. سوندىقتان التى اتانعا جۇك بولارلىق ابىروي-بەدەلىمدى ايتىپ، جارتى كۇنىڭدى الما. ءوزىمنىڭ دە ۋاقىتىم از.
ا، جارايدى. كورىنبەي كەتتىڭىز عوي.
سال-سەرى: نە مەن ساعان كورىنىپ تۇرۋعا مىندەتتى مە ەدىم؟
ويپىرماي، كوكە-اۋ، نە جاڭالىق دەگەن ءتۇرىم عوي. قايدان ءجۇرسىز، نە شارۋا دەگەن اڭگىمە عوي مەنىكى.
سال-سەرى: شارۋا بىلاي، وسى ەلدىڭ ابىز اقساقالداردىڭ ءبىرى بولعاننان كەيىن كورگەن-بىلگەنىمدى حالقىممەن بولىسەيىن دەپ كەلدىم. كورگەنىمدى ايتىپ، بىلگەنىممەن بولىسپەسەم ءابىلماجنۇن عيباداتي عاجايىبي حاقايىق دەگەن اتىم قايدا؟
ۋاليبەك: ا، ءجون ەكەن كوكە. سونىمەن نە كوردىڭىز؟
سال-سەرى: سەن ودان دا نە كورمەدىڭ دە. ءبارىن كوردىم. ءبارىن ايتىپ ەزىپ تۇرار ۋاقىت جوق. مەن ساعان ەكسپو تۋرالى ايتىپ بەرەيىن.
ۋاليبەك: سوندا ءسىز ەكسپوعا باردىڭىز با؟
سال-سەرى: بارماعان دا شە. احمەتجان ەسىموۆ بار، تاعى ءبىردى-ەكىلى مينسيتر بار، ءبارىمىز بىرگە جۇردىك قوي. ويپىرماي ەكسپونى سالۋىنداي-اق سالعان ەكەن. باي-باي-باي... ۇلاناسىر كورمە بولدى. الپىس مىڭ قارۇي، وي قارۇي دەپپىن عوي، الپىس مىڭ پاۆيليون سالدى. ءۇش ميلليارد ادام ءجۇر.
ۋاليبەك: نە دەيدى قۇداي-اۋ. جەر بەتىندە بار-جوعى جەتى جارىم ميلليارد قانا ادام بار عوي.
سال-سەرى: ا-ا-ا؟! بىلمەيمىن ايتەۋىر سول ۋاقىتتا جەر شارىندا پۋستوي ماتەريكتەر كوپ بولدى عوي. سونىڭ ءبارى استانادا جۇرمەگەندە قايدا ءجۇردى. ايتىپ وتىرمىن عوي، ءتۇرى جامان كورمە بولدى.
ۋاليبەك: ويپىرماي، كوكە-اۋ، بوس پاۆيليوندار كوپ بولدى دەسەڭىز سەنەر ەدىك، بوس ماتەريكتەردىڭ كوپ بولعانىن ءسىز قايدان ءبىلدىڭىز؟
سال-سەرى: ەندى ول احاڭنىڭ ايتىسى.
ۋاليبەك: احاڭىڭىز كىم تاعى؟
سال-سەرى: احمەتجان ەسىموۆتى ايتامىن.
ۋاليبەك: ا-ا-ا، ءسويتىپ بىردەن ايتساڭىزشى. احاڭنىڭ اڭگىمەسى دەگەنىڭىز قازىر اپامنىڭ اڭگىمەسى دەگەن سياقتى بولىپ قالدى عوي... سەنۋ مىندەتتى ەمەس. ءوزىڭىز ونەر كورسەتكەن شىعارسىز.
سال-سەرى: كورسەتپەگەندە.
ۋاليبەك: قاي ونەرىڭىزدى كورسەتتىڭىز؟
سال-سەرى: قاي ونەرى نەسى؟
ۋاليبەك: باياعىدا ءوزىڭىزدى اقىن، جىرشى، جىراۋ، پالۋان، شاباندوز، كوكپارشى دەپ تانىستىرىپ ەدىم. سودان عوي، قاي ونەرىن كورسەتتى ەكەن دەپ سۇراپ جاتقانىم.
سال-سەرى: انا ەتنواۋىل تۇتاسىمەن مەنىكى بولدى عوي. بار جيعانىمدى ءسانى مەن سالتاناتىن كەلىستىرىپ جاساپ تاستادىم عوي. بىراق ءوزىم سول اقىن بولعاننان كەيىن ەكسپونىڭ جابىلۋ سالتاناتىندا ارناۋ ايتتىم.
ۋاليبەك: ەندى بىزگە سول ارناۋىڭىزدى ايتىپ بەرسەڭىزشى.
سال-سەرى: ءا، اقىننان ءسوز ارتىلعان با. شىقتىم دا ايتتىم.
ءاۋ، حالاۋ-ليلاۋ-ليلاۋ
حالاۋ-حالاۋ-ليلاۋ.
يگوگ-گيگوك-گيگوك،
يگوگ-گيگوك-گيگوك،
ۋاريداي، داريداي،
شيح-شاھ-پاح،-دەدىم. شەتەلدىكتەردىڭ ءبارى قول سوقتى.
ۋاليبەك: كوكە-اۋ، ءالى ءسوز قوسپاي ايتىپ ءجۇرسىز بە. ەشتەڭە تۇسىنبەسە شەتەلدىكتەر ناعىپ قول سوقتى دەيمىن دا.
سال-سەرى: ماسەلە سوندا. ءبىزدىڭ سەن سياقتى تۇك تۇسىنبەيتىندەر نە ايتقانىمدى ۇقپادى. شەت ەلدىكتەر اقيقاتتى ايتتى دەپ شۋلادى.
ۋاليبەك: سوندا انا سوزدەرىڭىزدەن نە اقيقات كورىپ ءجۇر ولار؟
سال-سەرى: تىڭدا. حالاۋ-ليلاۋ-ليلاۋ دەگەنىم – ءبىلىم ءمينىم الجىپ، بالام سودان ميلاۋ دەگەن ءسوز. يگوگ-گيگوك-گيگوك دەگەنىم – تومەن جاقتا مي كوپ، جوعار جاقتا مي جوق دەگەنىم. اريداي-داريداي دەگەنىم – بارىن مىنە شاشتىم، وسى ماعان نە كەرەك، ميىم بولسا تارىداي دەگەنىم. ال، ەندى شيح-شاح-پاح دەگەنىم ەكسپودان كەيىنگى جاعدايدى سۋرەتتەگەنىم...
ۋاليبەك: ويپىرماي، قاتتى ايتقان ەكەنسىز عوي.
سال-سەرى: ارينە، ءوستىپ جۇمباقتاپ ايتپاساڭ، ايتقىزۋشى ما ەدى ولار؟
ۋاليبەك: ايتپاقشى، انا نايزاداي كىرپىكتەرى جەرگە قاراپ قالاتىن قىزدار كەزىكپەدى مە؟
سال-سەرى: وي، ولار العاشقى كۇننەن باستاپ-اق كەزىكتى. بارعان كۇنى ءبىر كارىس قىز قيىلىپ قارادى. ءبىر ويىم گاستينيتساعا الىپ كەتسەم با دەپ قويادى...
ۋاليبەك: سودان؟
سال-سەرى: سودان كەيىنگى اڭگىمە ەل الدىندا ايتاتىن اڭگىمە ەمەس... ۇلاناسىر... تاڭعا جۋىق وياندىم دا ەي پويىزىڭنان قالىپ كەتەسىڭ دەدىم.
ءبىر اقىن جىگىتكە بۇرىنعى جۇرگەن قىزىنىڭ (تيپا مۋزاسىنىڭ) جازعان حاتى
ەديك، سالەم. قالايسىڭ؟ ولەڭدەرىڭدى وقىپ ءجۇرمىن. «عاجاپ ادەبيەت» گازەتىنىڭ سوڭعى سانىنا شىققان توپتاماڭدى وقىعاننان كەيىن، وزىڭە حات جازايىن دەپ شەشتىم. انا ءبىر ولەڭىڭدە «سەن دە مەنى ويلايسىڭ با؟» دەپ جازىپسىڭ. قالاي مەن سەنى ويلايمىن؟ ي تاك پروبلەما كوپ. ساديكتىڭ اقشاسى، كۆارتپلاتا، كرەديت دەگەندەر سەن تۇگىلى تۋعان اكەم مەن شەشەمدى ويلاتپايدى. سەن قۇساپ ءساتسىز ماحابباتقا ءىشىم اشىپ جۇرسە ارمان جوق ەكەن-اۋ، لومباردتا كۇيىپ كەتكەن التىندارىمدى ويلاسام، جىلاعىم كەلەدى. ي ۆاششە پروبلەما جوق بولسا دا مەن سەنى نە ءۇشىن ويلاۋىم كەرەك؟ ءجارايدى، ويلادىم دەيىن، سودان ساعان ۋدوۆنو بولا ما؟ نە ءسوز ول؟.
سودان كەيىن ءارتۇرلى گۇلدەرگە تەڭەگەنىڭدى قويشى. وقىپ وتىرىپ قاراپتان-قاراپ قىسىلام. جالپى مەنى اڭعا، قۇسقا تەڭەگەنىڭدى قويشى ا، قۇداي ءۇشىن. قۇرالايىم، كوگەرشىنىم دەگەن تەڭەۋلەرىڭ ماعان تۇك تە كەلمەيدى. مەن باياعى ابشياگانىڭ ارتىنداعى قىزىل قايىڭنىڭ تۇبىندە سىزىلىپ تۇراتىن تالدىرماش قىز ەمەسپىن. مەن ەكى بالا تۋعان ايەلمىن. ي ساعان ايتايىن، ەكىنشى بالادان كەيىن قارنىم تارتىلماي قالدى. ايتپايىن دەسەم دە ايتقىزاسىڭ، جالپى دەنە-ءبىتىمىم بۇرىنعىداي ەمەس. كورسەڭ ليريكاڭدى جىيىپ قويىپ، ساتيرا جازىپ كەتەر ەدىڭ. ءجارايدى ونى دا قويشى، بۇرىنعى كەزىمدى ەلەستەتىپ جازىپ جۇرگەن شىعارسىڭ. ال انا «جات قۇشاقتا جاتىرسىڭ با» دەگەنىڭ نە ءسوز؟ اينالايىن-اۋ، ول مەنىڭ نەكەلى جارىم. قالاي ول جات قۇشاق بولادى؟ سوندا مەنىڭ قۇشاعىم - سەنىڭ قۇشاعىڭ با نە؟ سەنىڭ قۇشاعىڭدا جاتسام ءوز قۇشاعىمدا جاتقان بولامىن با؟ قوي، اينالايىن. جانە «وزگە وشاقتىڭ وتىن جاقتىڭ» دەگەنىڭدى دە تۇسىنبەدىم. بۇل مەنىڭ ءوز وشاعىم، ءوزىمنىڭ وتانىم. بۇرىن سەنىڭ وشاعىڭنىڭ وتىن جاقسام ءبىر ءجون ەكەن-اۋ. گازىڭا ءشاي دا قويىپ كورگەن جوقپىن عوي.
تاعى دا قايتالاپ ايتامىن، «ماڭگىلىك ماحابباتىم ءوزىڭ عانا» دەگەنىڭدى دە قوي. جالپى ماڭگىلىك ماحاببات دەگەن ءسوزدى ايتپاڭدارشى. وسى اقىن، جازۋشى دەگەندەر وتىرىك ايتقاندارىڭدى قويساڭدارشى. جاس بالدار شىن ەكەن دەپ قالادى عوي. سودان كەيىن «ءبىر عانا ماحاببات» دەگەندى دە ايتۋشى بولماڭدار. سەندەردىڭ كەسىرلەرىڭنەن ءبىرىنشى ماحابباتىنا قولى جەتپەگەندەردىڭ بارلىعى دا وزدەرىن باقىتسىز ساناپ، سورلاپ جۇرەدى. كوپتەگەن جاستاردىڭ ۇيلەنبەي جۇرۋىنە سەندەر – اقىن، جازۋشىلار كىنالىسىڭدەر. ەگەر ءبىر عانا ماحاببات بولاتىن بولسا، سەن قايدان شىقتىڭ، مەن قايدان تۋدىم؟ الدە مىنا جۇرتتىڭ بارلىعى كلاستاستارىنا ۇيلەندى دەيمىسىڭ؟ جوق، اينالايىن، بارلىعى دا ەكىنشى، ءۇشىنشى ماحابباتتارىنا ۇيلەنىپ، ۇرپاق ءوربىتىپ وتىر. ءتىپتى ءتورتىنشى ماحابباتىنا ۇيلەنىپ، كۇلىپ-ويناپ جۇرگەندەر كوپ. بەسىنشى ماحابباتىنان بەس بالا ءسۇيىپ، التىنشى ماحابباتىمەن التىن تويعا جەتكەندەر بار. سەندەر وسىنى نەگە ناسيحاتتامايسىڭدار؟ باياعىدا مامام كىتاپ وقى، كىتاپ وقى دەپ قاقساۋشى ەدى. وقىماعانىم قانداي جاقسى بولعان. وقىسام وسپانوۆا ايگۇل قۇساپ جۇرەر ەدىم قيالدانىپ، قاشان بويىندا ءبىر ءمىنى جوق جىگىت كەلىپ، ولە ءسۇيىپ، ەرتەگىدەي عۇمىر كەشەر ەكەنبىز دەپ.
بۇنىڭ ءبارى اشەيىن ويلاسۋ عوي. ەندى تىكەلەي وزىمە قاتىستىلارىن ايتايىن. «سەن دە مەنى سۇيگەن ەدىڭ» دەگەندى قايدان شىعاردىڭ؟ مەن ساعان قاشان سۇيەمىن دەپ ەدىم؟. راس، ۇناتتىم، جاقسى كوردىم. اسىرەسە كوزىڭدى سىعىرايتىپ كۇنگە قاراپ تۇرۋشى ەدىڭ عوي. سول ءساتىڭ ۇنايتىن. بىراق، ەندى سوعان بولا ۇيلەنە سالمايمىن عوي. ەكەۋمىز قوسىلىپ الىپ، سەن كۇنگە قاراپ سىعىرايىپ، مەن ايعا قاراپ الارىپ وتىرساق، تىرشىلىكتى كىم ىستەيدى؟ ءيا، ساعان سول كەزدەر ءۇشىن ەشقانداي وكپەم جوق. شىق دەدىڭ شىقتىم، كىر دەدىڭ كىردىم. تەاترعا باردىق، كينواعا باردىق. ءبارى-ءبارى ۇنايتىن. بىراق ءومىر بويى ەسەنتايدىڭ جاعاسىندا جۇرە بەرمەيتىن شىعارمىز. ءومىر بويى ستۋدەنت بولىپ جۇرە بەرەتىن بولساق، مەن دە جۇرە بەرەر ەدىم. ەڭ قۇرىماسا ماگيستراتۋراعا دا تۇسە المادىق. تاعى دا ەكى جىل جۇرە تۇرار ەدىك. جاتاقحانادان ايداپ شىققاننان كەيىن قايدا بارۋىم كەرەك؟. اۋىل دەگەن انوووۋ اتىراۋدا. ءبىر بارساڭ قايتا كەلۋ دەگەن اڭگىمە جوق. ال، مەنىڭ الماتىدا قالعىم كەلدى. سەنىڭ الا قوياتىن ءتۇرىڭ كورىنبەدى. سول كەزدەردە الماس جولىقتى. الماتىدا ءۇيى بار ەكەن، استىنا ماشيناسى بار ەكەن... سولاي...
سەن دە ەندى اقىن بولىپ جۇرە بەرمەي بىرۋاق ادام بول. قازاق پوەزياسىنىڭ ساعان وكپەسى جوق شىعار، ولەڭدى قويا تۇر دا ءومىرىڭدى ويلا. جان-جاعىڭا قاراشى، قانشاما قىزدار ءجۇر. شەتتەرىنەن ادەمى، سۇيكىمدى، اقىلدى، ءبىلىمدى. سولاردىڭ ىشىنەن ماعان ۇقسايتىن بىرەۋىن تاۋىپ ال دا، ۇيلەن. بوپەلەرىڭ بولادى. سودان كەيىن بالا تۋرالى، وتباسى تۋرالى، سۇيگەن جار تۋرالى، وتان تۋرالى جاز. تاقىرىپ اياڭ دا كەڭيتىن ەدى. مەن تۇگىلى ولەڭدى دە ويلاۋعا شاماڭ كەلمەيتىن كەزدەر بولار ەدى، ۇيلەنسەڭ. ال سەنىڭ ءجۇرىسىڭ مىناۋ. «و، مەنىڭ جۇرەگىم، جۇرەگىم...» دەيسىڭ دە جۇرەسىڭ. سەنىڭ جۇرەگىڭ اۋىرماعاندا، مەنىڭ جۇرەگىم اۋىرا ما؟
جۇرەگىڭ ەشتەڭە ەمەس، اراقتى قويماساڭ باۋىرىڭ اۋىرادى، سىرانى قويماساڭ بۇيرەگىڭ اۋىرادى، تەمەكىنى قويماساڭ وكپەڭ ءشىريدى. سودان كەيىن... جامان ايتپاي جاقسى جوق. قوي، اينالايىن. ءبارىن دە قوي.
ساعان باياعىدا ايتتىم، دومبىرا ۇيرەنىپ الساڭشى دەپ. ءبۇيتىپ ولەڭ جازىپ جۇرە بەرگەنشە، جۇرتتار قۇساپ ايتىسقا قاتىس دەدىم. ايتىسقا قاتىسساڭ عوي جاعدايىڭدى تۇزەپ الار ەدىڭ. ورىن الماعان ايتىسكەرلەر دە 100 مىڭ تەڭگەدەن، 200 مىڭ تەڭگەدەن الىپ قايتادى ەكەن. ورىن الساڭ ءتىپتى جاقسى. ماشينا ۇتىپ الساڭ ءتىپتى كەرەمەت ەمەس پە؟ جۇرتتىڭ بالالارىنان سەنىڭ ءبىر جەرىڭ كەم بە؟ ولار مىنگەن ماشينانى سەن مىنسەڭ، دوڭگەلەگى ءتۇسىپ قالار دەيمىسىڭ. بىلەم، وسى جولداردى وقىپ وتىرىپ، باياعى قىرسىق مىنەزىڭە سالىپ، كوشە ونسىزدا پروپكا دەپ وتىرعان شىعارسىڭ. ايتىسكەر بولماساڭ دا بەت اشىپ جۇرەر ەدىڭ عوي. تويلارعا بارعان سايىن، بەتاشارعا مىڭ تەڭگە، ەكى مىڭ تەڭگە سالعان سايىن، سەن ەسىمە تۇسەسىڭ. قۇداي-اۋ، ويلامايمىن دەپ وتىرىپ، ەسىمە تۇسەسىڭ دەگەنىم نە تاعى؟ ءيا، كەي-كەيدە ەسىمە تۇسەسىڭ. ايتىسكەرلەردىڭ سەنەن ءبىر جەرى ارتىق دەيمىسىڭ. سەنىڭ ايتقان ولەڭىڭدى ايتادى دا سوڭ جاعىن ءارايدىم، ءدارايدىم، ءدارايدىم، ءداي دەي سالادى بولدى. ءجارايدى قويشى، ساعان اقىل ايتامىن دەپ قولىم دا تالىپ كەتتى. بۇنىڭ بارلىعى ءوزىڭنىڭ پروبلەماڭ. مەنىڭ ەشتەڭەم كەتپەيدى.
ءسوزدىڭ سوڭىندا ايتارىم، قولىڭنان كەلەدى عوي، ءبىردى-ەكىلى حيت بولاتىن اندەرگە ءسوز جازشى. ابىسىندارمەن وتىرا قالىپ اڭگىمە ايتقاندا، ماقتانا قويايىن دەپ، ماعان باياعىدا اقىن جىگىت عاشىق بولعان دەسەم، «قويشى، قاي اندەردىڭ ءسوزىن جازعان؟»- دەپ سۇرايدى.
ال، ساۋ بول، ساعان جىنىم كەلىپ وتىرعانىن دا جانىم اشىپ وتىرعانىن دا بىلمەيمىن. ايتپاقشى، «ساعىنىپ سەن دە مەنى ءجۇر مە ەكەنسىڭ؟» دەگەنىڭە ايتارىم. ساعىنبايمىن. بىراق، كەيدە سەنىڭ تىستەپ سۇيەتىنىڭ ەسىمە ءتۇسىپ كەتە بەرەدى. ەرنىم ءىسىپ كەتۋشى ەدى عوي، جىندىباس.
P.S. حاتتى وقىعان اقىن جىگىت جاۋاپ جازباققا نيەتتى كورىنەدى...
پا، شىركىن رومانتيكا
تاڭدا تۇرسام قار جاۋىپتى. تاپ-تازا ەكەن. اپپاق ەكەن. بيىلعى جىلدىڭ بەرەكەسىمەن جاۋعان ءبىرىنشى قارى. تاڭعى ساعات 6:15تە جاڭبىر بولىپ باستالىپ، 6:35-تە قارعا اينالعان قار عوي. "قار قىلاۋىمەن، بالا سىلاۋىمەن وسەدى" دەگەن ماقال ەسىمە ءتۇستى. قالبالاقتاپ قونىپ جاتقان قار تۇيىرشەكتەرىن الاقانىما قوندىرىپ تۇرىپ قاتتى اسەرلەندىم. باياعى بالا كۇنگى اقىندىق قاسيەتىم ويانىپ كەتكەندەي بولدى. جىر جازباعالى ءبىراز ۋاقىت ءوتىپ كەتسە دە قاتتى اسەرلەنگەندىكى شىعار، ولەڭ جازعىم كەلدى. سۇمدىق كۇشتى ولەڭ جازعىم كەلدى. ۇيگە جۇگىرىپ كىرىپ قاعاز بەن قالامدى الا سالىپ وتىرا قالدىم. ءبىرىنشى جولدى ەرلان ءجۇنىس قۇساپ قينالماي بىردەن جازىپ تاستادىم. "قار جاۋادى جاپالاقتاپ" دەدىم. سوسىن ءبىراز ويلانىپ وتىرىپ قالدىم. تاك بۇل جاتتاندى جولدار. ءان سوزىندە دە تۋرا وسىلاي ايتىلادى. قاشانعى جاپالاقتاپ جاۋادى، بيىل قالبالاقتاپ جاۋسىن دەدىم. ءبىرىنشى جول وسىلاي وزگەرىسكە ءتۇستى. "قار جاۋادى قالبالاقتاپ" دەدىم. ءبىرىنشى جول وڭاي جازىلعانىمەن ەكىنشى جول ءبىراز قينادى. ۇيقاس تاپپاي ارى وتىردىم بەرى وتىردىم. شىعاتىن ءتۇرى بايقالمادى. سوسىن جىنىم كەپ كەتتى دە "ەي قويشى قۇرسىن، بىلتىر دا جاۋىپ ەدى عوي" دەپ جازدىم دا ورنىمنان تۇرىپ كەتتىم...
***
باياعىدا تەمەكى تارتىپ ۇستالىپ قالعانىمىزدا اعالارىمىز دۇرىستاپ ۇرىسپاعان، نەگىزى. -ءبىلات ناقۋ، ءوستىپ ءجۇرىپ ءبىر كۇنى قورانى ورتەيسىڭ،-دەپ، باستان ءبىر ۇرىپ جىبەرە سالعان. سودان ءبىز تەمەكىنىڭ جالعىز زيانى سول، قورانىڭ ورتەنىپ كەتۋىنە سەبەپ بولادى دەپ ويلاعانبىز. سودان نە كەرەك، قورانى ورتەپ الماساق بولدى دەپ، اسا ساقتىقپەن بۋداقتاتا بەردىك. قورادان الىس كەتىپ، پوليا جاققا بارىپ تارتتىق. تاراپ كەتكەن كولxوزدىڭ گاراجى جاققا بارىپ شەكتىك. جابىلىپ قالعان كلۋبتىڭ ارتىنا بارىپ بۋداقتاتتىق. بۇزاۋ ىزدەي شىققاندا سازدا ءجۇرىپ تۇتىندەتتىك. قورا ورتەنبەسە بولدى، ءشوپ ورتەنبەسە بولدى دەدىك. ورتەنەتىن ءشوبى جوق، قوراسى قالاعا كەلگەندە ءساپسىم اشىق كەتتىك... ەندى نە بولدى، ال؟ جامان بولدى. سول كەزدە اعالارىمىز: ءبىلات ناقۋ ءوستىپ ءجۇرىپ قورانى ورتەيسىڭ دەپ قويا سالماي، وسىنشاما بەيشارا قىلاتىنىن تۇسىندىرگەندە، تەرەڭدەمەي تۇرعاندا قويا سالار ما ەدىك، كىم ءبىلسىن. ەندى مىنە، جەتپىستەگى اكەمنىڭ جارتى جاسىنا كەلمەستەن، جازدى كۇنى شىلدەدە توقسانداعى شال قۇساپ كۇرك-كۇرك جوتەلىپ ءجۇرمىز...
كەت-ەي، گۋگل
ومىردەن كەرەگىڭدى ءوزىڭ ىزدەپ تاپپاساڭ، گۋگلدان ءۇمىت جوق ەكەن.
مەن باسقا نارسە سۇراسام، باسقا نارسە ايتىپ قۋىپ وتىر. مەن ودان شىن بايلىق سۇرادىم. ەل قاتارلى ءومىر سۇرەيىن دەپ. ول ماعان فيلوسوفيا ايتىپ، اقپارات بەرىپ قاراپ تۇر.
- وكەي، گۋگل، باقىت كەرەك ءبىر كەرىم.
- «باقىت دەگەن بىردە شاتتىق، بىردە مۇڭ».
- وكەي، گۋگل، بىتپەس بايلىق ىزدەپ ەم.
- تولە باباڭ «ەريتۇعىن مۇز» دەگەن.
- وكەي، گۋگل، دوستىق دەگەن نەمەنە؟
- «دوستىق پلازا». تەزدەپ جەتكىڭ كەلە مە؟
- وكەي، گۋگل، مەن ادالمىن وتانعا.
- "نۇر وتانعا" مۇشە بولسىن بوتاڭ دا.
- وكەي، گۋگل، قانداي ءبىزدىڭ بولاشاق؟
- «بولاشاق» ول بىلىمدىگە جول اشاد.
- وكەي، گۋگل، تويدىرا ما قاناعات؟
- ۆى حوتەلي مم ناپيسات «قاعانات».
- وكەي، گۋگل، ...قايتارامىن تامىزدا.
- قازىر اقشا تابۋ قيىن قارىزعا.
- كەت-ەي، گۋگل، بەرەتۇعىن تۇگىڭ جوق.
- ەي، مەنىڭ دە ەرىگەتىن جىنىم جوق.
بەيبىت سارىباي
"ادىرنا" ۇلتتىق پورتالى
