مەملەكەت باسشىسى قاسىم-جومارت توقاەۆ رەسەي پرەزيدەنتى ۆلاديمير پۋتينمەن كەزدەسۋ وتكىزدى، دەپ حابارلايدى “ادىرنا” ۇلتتىق پورتالى “اقوردا” سايتىنا سىلتەپ.
“اڭگىمەلەسۋ بارىسىندا مەملەكەت باسشىسى شىۇ سامميتىنە قاتىسۋعا كەلگەنى ءۇشىن ۆلاديمير پۋتينگە ريزاشىلىعىن ءبىلدىردى. سونداي-اق رەسەيدىڭ «شانحاي رۋحىن» نىعايتۋ ىسىنە جانە ۇيىمعا مۇشە ەلدەرمەن كوپجاقتى ىنتىماقتاستىقتى دامىتۋعا ايتارلىقتاي ۇلەس قوسقانىن اتاپ ءوتتى” دەلىنگەن حابارلامادا.
“شانحاي ىنتىماقتاستىق ۇيىمىنا توراعالىق ەتۋ – وتە مارتەبەلى ءارى جاۋاپتى ميسسيا. ەرتەڭ ءبىزدىڭ توراعالىعىمىز اياسىندا اتقارىلعان جۇمىستار تۋرالى باياندايمىن. ۇيىمنىڭ وزىندە رەفورما جۇرگىزىلىپ جاتىر. ايتسە دە بۇل وڭاي شارۋا ەمەس. شىۇ حالىقارالىق ارەنادا لايىقتى بەدەلگە يە بولدى. مەنىڭ ويىمشا، بۇل – ەڭ تابىستى حالىقارالىق ۇيىمداردىڭ ءبىرى. سونىمەن قاتار بۇل – دەموكراتيالىق سيپاتتاعى ۇيىم، ياعني بارلىق مەملەكەتتىڭ تەڭدىك قاعيداتى ساقتالادى. ارينە، شانحاي ىنتىماقتاستىق ۇيىمىنىڭ الەۋەتىن نىعايتۋعا رەسەيدىڭ قوسقان ەلەۋلى ۇلەسىن اتاپ وتپەسكە بولمايدى. وسى ورايدا توراعا قۇقىعىن پايدالانىپ، سىزگە العىس ايتقىم كەلەدى” دەدى پرەزيدەنت.
مەملەكەت باسشىسى ستراتەگيالىق سەرىكتەستىك پەن وداقتاستىققا نەگىزدەلگەن قازاق-رەسەي قاتىناستارىنىڭ قازىرگى جاي-كۇيى مەن دامۋ پەرسپەكتيۆاسى جونىندە ايتتى.
قاسىم-جومارت توقاەۆ ۆلاديمير ءپۋتيننىڭ قازاقستانعا بىلتىر قاراشا ايىندا جاساعان تاريحي ساپارىنان كەيىن ەكىجاقتى ىنتىماقتاستىق قارقىندى دامىپ كەلە جاتقانىنا نازار اۋداردى.
“بۇعان دەيىن قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسىن ءوز باقىلاۋىمدا ۇستاپ وتىرمىن. ءسىزدىڭ ساپارىڭىز كەزىندە كەلىسىلگەن جوبالاردىڭ ماڭىزى زور جانە ەلدەرىمىزدىڭ ءوزارا ىقپالداستىعىنىڭ ستراتەگيالىق سيپاتىمەن ۇشتاسادى. سوندىقتان ولاردىڭ جۇزەگە اساتىنىنا ەش كۇمانىم جوق. ويتكەنى بۇل جوبالار قازاقستان مەن رەسەي فەدەراتسياسىنىڭ مۇددەلەرىنە ساي كەلەدى” – دەدى مەملەكەت باسشىسى.
قاسىم-جومارت توقاەۆ ۆلاديمير ءپۋتيندى بيىل كۇزدە ەلىمىزگە تاعى دا مەملەكەتتىك ساپارمەن كەلۋگە، سونىمەن بىرگە ۇقشۇ ۇجىمدىق قاۋىپسىزدىك كەڭەسىنىڭ وتىرىسىنا قاتىسۋعا شاقىردى.
