قۇرمانعازى اتىنداعى قازاق ۇلتتىق كونسەرۆاتورياسىنىڭ «حالىق مۋزىكاسى» فاكۋلتەتىندە «حالىق ءانى»، «دومبىرا» جانە «قوبىز-بايان» سىندى ءۇش كافەدرا بولسا، ەندى تاعى ءبىر «ءۇش ىشەكتى جانە فولكلورلىق اسپاپتار» كافەدراسىمەن تولىقتى.
2024 جىلدىڭ 26 ماۋسىمداعى قۇرمانعازى اتىنداعى قازاق ۇلتتىق كونسەرۆاتورياسى عىلىمي كەڭەسىنىڭ شەشىمىمەن حالىق مۋزىكاسى فاكۋلتەتىندە جاڭا «ءۇش ىشەكتى جانە فولكلورلىق اسپاپتار» كافەدراسى اشىلدى.
پروفەسسور، كۇيشى-كومپوزيتور تولەپبەرگەن توعجانوۆ «حالىق مۋزىكاسى» فاكۋلتەتىنىڭ دەكانى بولعان 2 جىل ىشىندە قازاقتىڭ ۇلتتىق مۋزىكاسى تاريحىندا ەلەۋلى جاڭالىقتار جاساپ جاتقانىن باسا ايتۋىمىز كەرەك.
پروفەسسور ت.توقجانوۆ بىلتىر «دومبىرا» كافەدراسىندا «ءۇش ىشەكتى دومبىرانى» ماماندىق رەتىندە ەنگىزىپ، ستۋدەنتتەر قابىلداعان بولاتىن. قازاقتىڭ مۋزىكالىق اسپاپتارىن وقىتۋ اياسىن كەڭەيتۋ جولىنداعى ت.توقجانوۆتىڭ ىزدەنىستەرى مەن ەڭبەكتەرى ناتيجەلى بولىپ، بيىل جاڭا ءبىر كافەدرانى اشۋعا قول جەتكىزىپ وتىر.
كونسەرۆاتوريا اشىلعان 80 جىل ىشىندە تۇڭعىش رەت اشىلىپ وتىرعان «ءۇش ىشەكتى دومبىرانى» ماماندىعى جانە «ءۇش شەكتى جانە فولكلورلىق اسپاپتار» كافەدراسىنىڭ اشىلۋىنا كونسەرۆاتوريا رەكتورى نۇركەن ءاشىروۆ پەن وقۋ جانە وقۋ-ادىستەمەلىك جۇمىستار جونىندەگى پرورەكتورى گۇلنار ءابدىراحماننىڭ ەڭبەگى وراسان.
«قازاق ونەرى مەن مادەنيەتىنە قوسىلعان جاڭا «ءۇش شەكتى جانە فولكلورلىق اسپاپتار» كافەدراسى قۇتتى بولسىن! حالقىمىزدىڭ مۋزىكا ونەرى الەمگە تانىلىپ، رۋحاني مۇرامىزعا اينالۋى، ۇلتتىق اسپاپتارىمىزدىڭ دامۋى ءۇشىن ونى جاستارعا وقىتۋ اياسىن دا كەڭەيتۋگە بارىمىزدى سالىپ جاتىرمىز. جاڭا كافەدرا قۇرامىندا شەرتەر، سىبىزعى، جەتىگەن، ساز-سىرناي، دومبىرا-پريما، دومبىرا-باس اسپاپتارى بار.
جاڭا كافەدرا – ۇلتتىق مۋزىكامىزدى وقىتۋ ىسىندەگى جاڭا بەلەسىمىز. كونسەرۆاتوريا اكىمشىلىگىنە، پرورەكتور گۇلنار ابدىراحمانعا جانە جاڭا كافەدرانىڭ ماڭىزىن سەزىنىپ قولداعان عىلىمي كەڭەس مۇشەلەرىنە العىسىم مەن ريزاشىلىعىمدى بىلدىرەمىن»، – دەيدى «حالىق مۋزىكاسى» فاكۋلتەتىنىڭ دەكانى، پروفەسسور ت. توعجانوۆ.
“ادىرنا” ۇلتتىق پورتالى
