2023 جىلدىڭ 12-13 مامىر كۇندەرى الماتى شاھارىندا الەمگە ايگىلى ۆيرتۋوز-سكريپكاشى مارات بيسەنعاليەۆ پەن قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ بىرلەسكەن ەكسكليۋزيۆتى پرەمەراسى ءوتتى. ەسىمى جاھان جۇرتشىلىعىنا تانىمال ونەر يەسىنىڭ قازاق مۋزىكاسىنىڭ اسقاق شىڭىنا اينالعان ۇلتتىق وركەسترمەن بىرلەسە وتكىزگەن مۋزىكالىق جوباسى ەلىمىزدىڭ مۋزىكا مادەنيەتىندەگى ايتۋلى وقيعا بولدى.
الەمدىك كلاسسيكالىق تۋىندىلاردىڭ شەدەۆرلەرى ورىندالعان كەشتە ۇلتتىق وركەستر، قر ەڭبەك سىڭىرگەن قايراتكەرى مارات بيسەنعاليەۆ، جاس مۋزىكانت، ۆۋندەركيند، پيانيست، ۇندىستانداعى NCPA اكادەمياسىنىڭ وقۋشىسى اياان دەشپاندە ونەر كورسەتتى.
قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ باس ديريجەرى، مەملەكەتتىك «دارىن» جاستار سىيلىعىنىڭ لاۋرەاتى ابىلاي تىلەپبەرگەن ەرەكشە كەش تۋرالى ءوز ويىن ءبىلدىردى:
– ارينە، ەكى كۇنگە سوزىلعان الەم ادامىنىڭ ۇلتتىق وركەسترمەن بىرلەسە ۇيىمداستىرعان كونتسەرتى وتە جوعارعى دەڭگەيدە ءوتتى. ەكى كۇن بويى قۇرمانعازى وركەسترىنىڭ عيماراتى ونەر سۇيەر كورەرمەن قاۋىمعا لىق تولى بولدى. بارشا كورەرمەندەرمىزدىڭ ىستىق ىقىلاسىنا، ونەرگە دەگەن سۇيىسپەنشىلىگىنە العىسىمىزدى بىلدىرەمىز. الەمدىك دەڭگەيدەگى كلاسسيكالىق تانىمال تۋىندىلاردى قازاقتىڭ حالىق اسپاپتارىنىڭ سۇيەمەلدەۋىمەن ورىنداۋ، ءارى ونى تىڭداۋ جۇرەككە قۋانىش، كوڭىلگە جىلۋ ۇيالاتادى.
ايتا كەتەيىك، مارات بيسەنعاليەۆ – الەمدىك مۋزىكا مانەديەتىندە وزىندىك ورنى بار دارابوز مۋزىكانت. ول حالىقارالىق مۋزىكا مادەنيەتىنە قوسقان ۇلەسى ءۇشىن التىن ديسكىلەردىڭ جانە ۇكىمەتتىك ناگرادالاردىڭ يەگەرى. بۇگىندە مارات بيسەنعاليەۆتىڭ تاڭعاجايىپ ونەرى تۋرالى اتاقتى بريتاندىق «The times» گازەتى «كەرەمەت سكريپكا ءسوليسى»، ال امەريكاندىق «Fanfare» جۋرنالى «قازىرگى زامانعى يزاي» دەپ جازدى. سونداي-اق «The New York Times» ونەر يەسى تۋرالى «ول 19 عاسىردىڭ باسىنداعى سكريپكادا ويناۋ شەبەرلىگىنىڭ ايرىقشا بەلگىسى بولعان ۇتىمدى ستيلدەردى جانداندىرىپ قايتا جاڭعىرتۋشى» دەپ جارىسا جازۋدا.
